Shillong, Jylliew 05 : U kyrtong ka Meghalaya Democratic Alliance-II bad National Vice President ka NPP James PK Sangma un sa leit thep kyrteng kum u kyrtong ka elekshon Rajya Sabha ha ka 8 tarik Jylliew, ong u Secretary ka Assembly Malthus Sangma ha ka sngi Thohdieng.
Ka sngi ba khatduh ban thep kyrteng sha ka elekshon Rajya Sabha kan long ha ka 8 tarik Jylliew (sngi Nyngkong). U kyrtong na ka NPP u kwah ban wan thep kyrteng mynta ka sngi, hynrei nga la ioh jingtip ba ki dang pynkhreh ia ki katto katne ki kot ki sla” ong u Sangma haba iakren bad ki nongthoh khubor.
“Ki don katto katne ki kot ki sla kiba hap ban pynkhreh. Ki don ki affidavit kiba donkam ban ioh jingbit. Kumta, ki don katto katne ki kot ki ban dang pynkhreh, kumta kin sa wan ha ka sngi Nyngkong ha ka por 11 baje mynstep” ula bynrap.
Ka jingiathep vote kan long ha ka 18 tarik Jylliew naduh ka por 9 baje mynstep haduh 4 baje janmiet bad ka jingniew ia ki vote kan long ha kajuh ka sngi ha ka por 5 baje janmiet.
Ia kane ka elekshon la pynlong hadien ba ka samoi treikam jong u MP ba mynta kan kut noh ha u Jylliew-Naitung 2026.
