Shillong, Jylliew 05 : U Myntri Rangbah ka Jylla Conrad K Sangma ha ka sngi Thohdieng, ula lamkhmat ia ka Rhododendron Plantation Drive ne ka jingiathung dieng tiewsaw, ha Sangmein, 5th Mile, Upper Shillong, kum shibynta jong ka jingrakhe ia ka World Environment Day 2026.
Ia kane ka prokram la pynlong da ka Tnad Forest & Environment hapoh matpdeng “Inspired by Nature. For Climate. For Our Future”.
Kane ka jingiathung dieng ka phaikhmat sha ka jingpynneh pynsah bad pynroi ia ki dieng Rhodendendron arboretum, ba ju tip ha ka Khasi kum diengtiew saw bad Latuthin ha Jaintia.
Ia kane ka prokram la pynlong ha Rhododendron Trek ha Upper Shillong, kaba thmu ban kyntiew ia ka jingsumar ia ka mariang, ban pynneh pynsah ia ki jingthaw ba im, bad ban pynrben biang iaki khlaw ki btap haba sumar ia ka spah mariang ba ioh pateng ka Jylla.
Haba ai jingkren, u Myntri Rangbah ula ban jur ba ki prokram ka Sorkar ki dei ban iai pynleit jingmut halor ki nongshong shnong bad ka bha ka miat u paidbah ha ka jaka ki heh ki hain bad ka burom kyrdan.
“Ki prokram kum kine kim dei ban long shaphang ki VIP bad ki Myntri Sorkar hynrei ki dei ban long na ka bynta u paidbah bad ki nongshongshnong” ula ong haba ban jur ba ki prokram ka Sorkar ki dei ban long beit na ka bynta u apidbah bad ban shakri ia ka thong kaba heh iar jong ka bha ka miat u paidbah bad ka jingiashimbynta ki shnong ki thaw.
U Myntri Rangbah ula ai burom pynban ia ki khynnah skul ha ka kyrteng jong ka Sorkar Meghalaya bad pynshlur ia kiwei ki Ophisar, kynthup u Chief Secretary, ban iasnohkti ha kaban ithuh ia ki khynnah namar ka jingiashimbynta bad jingsynniang.
Haba kren halor ka jingkongsan ka World Environment Day, u Myntri Rangbah ula ong ba katba ka 5 tarik Jylliew ka long kum ka jingpynkynmaw ba donkam ia ka jingkitkhlieh halor ka mariang, ka jingsngewthuh halor ka mariang ka dei ban bteng palat ia ka shisngi.
“Ha nga, man ka sngi ka dei ka Environment Day. Baroh 365 sngi jong u snem ka dei ban long ka Environment Day. Kane ka sngi ka dei ka jingpynkynmaw ia ngi ban pynthikna biang ialade ha kaban iada bad pynneh pynsah ia ka mariang jong ngi, hynrei ka jingkitkhlieh jong ngi kam kut satia hangne” ula ong.
Ula ban jur ba ka jingpynneh pynsah ia ka mariang kaba don jingmut ka dei ban long da ki kam kiba rit, manla ka sngi bad ka jingkylla ha ka rukom im bala jied hi da ki briew. Kat kum ka jingong jong u, ka jingiapyrshang lang, wat haba paw kum kaba rit eh, ka lah ban wanrah ia ka jingkylla kaba khraw haba la shim lang da ka imlang sahlang baroh kawei,
“Kam dei satang tang halor ka jingthung ia ki dieng lane iashimbynta ha ka jingpynkhuid shnong tang ha ka shisngi bala buh. Ka dei halor ka jingjied kaba rit kaba ngi leh man ka sngi-ka recycle, jingpyniaid kam biang ia ki mar, jingtyngkai ia ka bording, jingpynlip ia ki light habym donkam, pynduna ia ka jingpyndonkam ia ki kali, jied ia ki lynti kiba neh, bad thung briew kat haba lah. Kine ki kam kiba rit, haba khein sien ang ia ki hajar bad million ki briew, ka lah ban wanrah ia ka jingkylla kaba hraw” ula ong.
Haba kren halor ka jingthung dieng tiewsaw ha kane ka prokram, ula ong ba kane ka sienjam kan synniang ym tang sha ka jingpynneh ia ka mariang hynrei ruh kan long sha ka kam jngohkai ka Meghalaya.
“Ngi la thung ia ki symbai diengtiew saw namar ngi ngeit ba kane ka dei kawei pat ka synniang ba don jingmut sha ka mariang jong ngi. Ha kajuh ka por, kan nang pynsngewtynnad ia ki nongwan jngohkai ban iohi ia kum kine ki dieng bad ban iaid kai ha kine ki lynti iaid kjat ba itynnad. Da ka jingpynneh pynsah bad pynitynnad shu shuh ia ka mariang jong ka Jylla, ngi lah ban khring kham bun ki nongwankai bad thaw ia ki lad kamai jakpoh ia ki samla jong ngi”.
Kane ka prokram ka iaid lang ruh bad ka National campaign “Ek Ped Maa Ke Naam” bad kyntiew ia ka nongrim jong ka LiFE (Lifestyle for Environment), kaba pynshlur ia ki nongshongshnong ba kin shim ia ka jingkitkhleh ban leh ia ki kam kiba iada ia ka mariang kum ka jingtyngkai ia ka um bad ka bording, pynduna ia ka jingpynmih jaboh, kiar na ka jingpyn donkam ia ki plastic ba shisien pyndonkam bad kiwei kiwei.
U Chief Secretary Shakil P Ahammed, ki Ophisar Rangbah ka Sorkar, ki Ophisar ka Tnad Forest & Environment, ki nong mihkhmat na ki Shnong ka thain bad ki khynnah skul na San Met Basic School, St.Gabriel School bad Saw Mer Presbyerian School, kila iadonlang ha kane ka prokram.
