Plie u Conrad ia ka Eco-Cottage bad Glass House Restaurant ha Mawrah
Shillong, Jylliew 05 : U Myntri Rangbah ka Jylla Conrad K Sangma, ha ka sngi Thohdieng, ula pynbna ba un sa pynmih jingbthah sha ki Tnad Sorkar ba nangne shakhmat, ki dei ban pynthikna ba ki prokram Sorkar ki dei pynleit jingmut ha kaban ithuh ne pynkupbor ia u paidbah ym ban burom ia ki heh ki hain.
U Myntri Rangbah ula pynpaw ia kane haba iashimbynta ha ka jingrakhe World Environment Day 2026 ha shnong Mawrah, East Khasi Hills haba pynskhem ia ka jingkut jingmut jong ka Sorkar Jylla ban pynneh pynsah ia ka mariang, ka kam jngohkai kaba neh bad ka roi ka par ba lamkhmat da ki Shnong ki thaw.
Haba ai jingkren ha ka jingialang, u Myntri Rangbah Conrad K Sangma ula khot ia ka rukom treikam kaba khlain kaba buh hakhmat ia u paidbah ha ki prokram ka Sorkar bad pynbna ba ki nongmihkhmat paidbah bad ki nongtrei Sorkar ki dei ban pynleit jingmut ha kaban pynkupburom ia ki nongshongshnong ha ka jaka ban pyndon burom ialade.
Ula pynbna ba un sa pynmih ia ka jingbthah sha ki Tnad Sorkar ba kin pynthikna ba ha ki prokram ka Sorkar, ka jingpynleit jingmut kan long beit halor ka jingithuh bad rakhe na ka bynta ki nongshongshnong bad ki dkhot ka imlang sahlang.
Kane ka prokram, ka dei kaba la pynlong da ka Tnad Tourism bad ka Meghalaya Basin Management Agency (MBMA), halor ka matpdeng “Inspired by Nature, For Climate, For Our Future”.
U Myntri Rangbah ula leit jngoh bad plie ruh ia ka Eco-Cottage ba dang shu dep shna bad ka Glass House Restaurant ha Pung Mawrah, kaba thmu ban pynkhlain ia ka Eco-Tourism ha ka thain haba pynkha ruh ia ka lad kamai jakpoh kaba neh na ka bynta ki trai shnong.
Nalor kane, ula sam ia ki cheque Green Meghalaya sha ki nongioh bynta hapoh ka State Payment for Ecosystem Services (PES)-ka prokram ba pynshlur ia ki shnong ki thaw ba kin iada, sumar bad pyniaid ha ka rukom kaba iai neh ia ki khlaw ki btap ka Jylla, nalor ka jingiathungdieng da kaba ia ka rukom thungdieng Miyawaki, ka buit thungdieng ba pynsted ia ka jingroi ki khlaw ba rben, ki khlaw tynrai bad kyrshan ia ka jingpynbha pat ia ka mariang.
Haba pynpaw ia ka jingkmen ba don ha Mawrah ha ka World Environment Day, ula batai ia ka shnong kum ka nuksa kaba khlain bha ia kaei kaba lah kynjoh haba ki nongshongshnong bad ka Sorkar ki iatrei ryngkat ryngkat. Haba pynkynmaw ia ka jingpynkylla dur ia ka thain, ula pynpaw ba dang ha kine ki khyndiat snem bala leit, ka shnong kala madia ka jingkyrduh um, ka jingnang duna ki jingthung jingtep bad jingnang jot ka mariang.
“U Myntri Rangbah ula pynpaw ba kumno ka jingpynim pat ia ki umpohliew, ka jingthung ia ki dieng ki siej, bad ka jing shna ia ka jingtei ban pynlang um kala pynkylla ia ka shnong sha ka jaka wan jngohkai ba dang mih thymmai haba ha kajuh ka por kala lah ban pynbiang ia ka jingdonkam um ka thain bad ka thaw ia ki lad kamai jakpoh.
Haba kren halor ka jingplie ia ka Eco-Cottage bad ka Glass House Restaurant, ula batai ia kine ki jingtei kum kawei na ki jingtei ba kham pher kiban khring ia ki nongjngohkai ha Meghalaya bad ong ba kine kin ai ia ki nongwankai ia ka jingshem ka ban sah jingkynmaw. Hynrei, ula ban jur ba ka kam jngohkai ka iaid palat ban ia ka jingdon ki jingtei.
“Ka kam jngohkai kam dei eh tang halor ki jingtei. Ka kam jngohkai kam dei eh tang halor ki restaurant ne cottage. Ka kam jngohkai ka dei eh halor ka jingshem” ula ong haba bynrap ba ka jingjop jong ka jaka wankai kan shong eh ha ka jingpdiang sngewbha, ka jingsngewtynnad bad ka jingiashimbynta jong ki trai nongshongshnong.
Haba pynpaw ia ki jingthmu kiba iar jong ki prokram ka Sorkar, u Myntri Rangbah ula kynthoh ba ki project kam pynroi ki dei ia kaban thew da ka jingktah ia ka jingim ki briew.
“Ka jingjop kam dei ia kaban thew da ka jingplie ia ki reservoir, ka restaurant lane ka cottage. Kine ki dei ki mawmer ba kongsan, hynrei ka jingthew ba shisha ia ka jingjop ka shong eh ba kumno kine ki project ki kyntiew ia ka jingim ki briew” ula ong.
Halor ka jingkongsan ka World Environment Day, u Myntri Rangbah ula pynkynmaw ia ki nongshongshnong ba ka jingkit khlieh ia ka mariang ka dei ban iaid palat ia ka jingrakhe kaba shisngi.
U MLA ka Sohra Bah Gavin Miguel Mylliem ula ong ba kane ka prokram ka pyni ia ka jingiatreilang ban pynneh pynsah ia ka mariang, ka jingiashimbynta ka shnong, bad ka jingpynroi ia ki kam jngohkai kaba neh.
Haba shim ia ka Mawrah kum ka model village, ula kren halor ka jingjop jong ka ha ka jingtyngkai ia ka um bad ka jingsumar ia ka mariang lyngba ka jingiapyrshang lang jong ki paidbah bad ka jingkyrshan ka Sorkar.
Kiba ai jingkren ki kynthup ruh ia u Chief Secretary Shakil P. Ahammed, Commissioner & Secretary, Tourism, Vijay Kumar D, Sordar of Mawrah, Phrangsngi Nongrum .
