Shillong, Jylliew 02 : U Nongialam ka NPP bad Myntri Sorkar Bah Wailadmiki Shylla ha ka sngi Ba-ar, ula ong ba kam shym don satia kano kano ka jingiashrut hapoh Iing halor ka jinglong kyrtong sha ka shuki MP Rajya Sabha, haba bynrap ba ka rai ba khatduh ka sjong eh ha ki Nongialam ba halor.
“Phi iohi, khlem pep nga don la ka jong ka jingsngew, kiwei ruh kin don la ki jong ki briew kaba ki kwah ban rah, kumta, kane kam mut ba ka don ka jingiashrut, ka dei ka hok jong baroh ban rah iala ki jong ki briew kaba ki sngew ba ki biang” ong u Bah Wailad haba iakren bad ki nongthoh khubor.
Ula ban jur ia ka jingiatylli ka party hapdeng ki jingiakren halor ka jingmih bun ki kyrteng.
“Kum ka party, kumba ong u Myntri Rangbah, ki Symbud Myntri Rangbah bad kiwei, ka NPP ka dei ka Longiing kaba heh bad ba kmen, kumta kano kano kaba rai da ki nongialam jong ngi, ngi burom ia ki rai jong ki” ula ong.
Haba kylli, ula ong “Ki don saw tylli ki kyrteng kiba mih, ha ki lad pathai khubor ruh kila mih, hynrei kumba nga ong, haba kut ka dei ka rai jong ki Nongialam kiba halor”.
