Yn pan jingkyrshan na ki CM, Myntri ialehkai bad ki MP
Shillong Risaw 02: Ka North East Olympic Association kaba kynthup ia ki President bad General Secretary jong ki synjuk ialehkai ka thaiñ Shatei Lam Mihngi ha ka 30 tarik u Nailur, kila shong jingialang ha ka ITC Hotel, Ahmedabad Gujarat ban iatai halor ka jingpynkhreh ban pynlong iaka North East Olympic Games ha Meghalaya.
Ia katei ka jingialang la pyniaid da u President ka NEOA u Th. Radheshyam bad kiba la wan iashim bynta ki kynthup ia ki nongialam jong ki Olympic Association na ki 8 tylli ki jylla ka thain Shatei Lam Mihngi – ka Assam, Arunachal, Manipur, Meghalaya, Mizoram, Nagaland, Sikkim bad Tripura bad ha kane ka jingialang ka pynthymmai ruh ia ki nongkitkam jong ka NEOA.
U Working President bad u General Secretary ka Meghalaya State Olympic Association (MSOA) u Bah John Kharshiing bad u Bah Finely L Pariat kila ai jingbatai halor ka jingpynkhreh ban pynlong iaka North East Olympic Games bad kiba la iashimbynta haka jingialang kila ai bun tylli ki jingai jingmut iaka Meghalaya NEOG Organising Committee ha kaban pynlong ia katei ka lympung ialehkai.
Ki nongialam na ka jylla Nagaland kibala kren ha katei ka jingialang kila pynpaw iaka jingthrang ban pynlong iaka North East Olympic Games 2024 ha ka jylla Nagaland bad ki nongialam jong ka NEOA kila pdiang ia katei ka jingtyrwa bad yn sa iatai bniah kham hadien bad kala don ruh ka jingai jingmut ba ha ka North East Olympic Games 2024 dei ba npynlong tang ia ki jait jingialehkai kiba ju pynlong haka Olympic.
Ka jingialang kala shim ruh ia ka rai ban lum iaka jingialang bad baroh ki Myntri Rangbah, ki Myntri ka tnad Sports bad ki Members of Parliament (MP) jong ka thaiñ shatei lam mihngi bad ban pan iaka jingkyrshan ka jongki na ka bynta ban kyntiew bad ia ki kam ialehkai haka thaiñ baroh kawei.
Ha katei ka jingialang la jied ruh ia ki nongkitkam bathymmai jongka NEOA kiba kynthup ia u Th. Radheshyam (Manipur) kum u President, u Abu Mehta, (Nagaland) kum u Working President, u Bah John F Kharshiing (Meghalaya) kum u Secretary General, u Mazawma Vanchong (Mizoram) kum u Treasurer, u Abraham K Techi (Arunachal), u Kuber Bhandari (Sikkim), u Lakhya Konwar (Assam) bad u Rupak Debroy (Tripura) kum ki Vice President bad ki General Secretary na baroh ki jylla kum ki Dkhot.
Attachments area
