Shillong Jymmang 28: Haba pynphai nia ia ka jingleh ka VPP kaba synshar ia ka KHADC halor ka jingsuspon ia u Syiem ka Hima Mylliem Paiem Ainam Manik Syiem, u Nongialam ka Liang Pyrshah bad MDC ka UDP Bah Titosstarwell Chyne hynne ka sngi Palei, ula ong ba yn ap shwa ban ioh ia ki jingtip kiba bniah hashwa ba yn pynpaw ia ka nongrim ka jongu bad pynpaw pat ba u Syiem uba la shah jied um dei ban shu shah weng jyndat khlem da iaid da ka rukom kaba dei.
“Na ka liang jong nga, nga sngew ba ngam pat dei ban kren eiei ia ka kam kaba la leh da ka Executive Committee (EC). Lada ki sngewdei ba ka long kaba dei ban weng iano iano, te ngan ong shuh kumno” ong u Bah Chyne.
U Bah Chyne ula ong ba ym pat iohi ia ka nongrim jong ka hukum kaba la pynmih da ka EC.
“Haduh mynta ngam tip hi ruh ia ka daw balei kila weng noh ia u. Ngam pat leit sha ophis namar ba ngam shim la don shane” ula ong.
“Ngam tip ia ki daw, hynrei shisien ba nga lah ioh jingtip ia ki daw, ngin sa iakren namar ba wat ka dorbar jong ka Council ruh kadei kaba lah jan long”.
Ula bynrap ba ia katei ka mat yn rah hapoh jong ka iingdorbar. “Ngin sa ia peit ha ka por ba don ka dorbar, ia kaei kaba ngin iakren bad ban buh ia ki jingkylli”.
Haba banjur ia ka rukom treikam ka Council katkum ka riti synshar u Bah Chyne ula ong, “Ka jingthmu jong ki District Council ka long ban iada bad pynneh pynsah. Ka District Council kadei tang ka nongiada bad ban pynneh pynsah ia ka riti dustur tynrai, ka jingpyniaid ia ki shnong ki thaw, ki Kur, ki Hima jong ngi, kumba la pynkup bor da ka khyrnit kaba hynriew ia kaba la ai ha ngi”.
“Katkum ka jingsngewthuh ka jong nga, kadei ka kamram jong ka District Council ban pynneh pynsah. Hynrei ha ka jingiaid ka por, ki ju mih ki jingthud jingwit, ki kynrum kynram hapoh jong ka Hima bad kitei ki kynrum kynram ki wan na ki Hima, ym na ka District Council” ula ong.
Kaei kaba ka Council kadei ban leh, u Bah Chyne ula ong, ba ka don ka rukom treikam kaba la don lypa. “Ka nongrim jong nga ka long ba ha kano kano ka Hima kaba don ia ki kynrum kynram, lada u Syiem u leh donbor marwei ia ki paitbah, ym sngap ia ki Myntri, ka don ka rukom treikam, kaba ka District Council ka lah ban shimkhia ia katei ka kam lada ioh ia ka jingujor. Ka don ka jingkhot ban bishar bniah, ka jingai ia ka Show Cause bad kumta ter ter”.
“Ki don ki bynta jong ka rukom pyniaid ia ki kam ki jam” ula banjur “Hynrei kam shim la don pat kano kano ka por ba ka District Council kan shu weng beit mardor iano iano ruh, ia u Syiem uba la shah jied lyngba ka jingpynlong ia ka elekshon”.
Ula batai shaphang u Syiem uba la shah jied bad u Syiem uba shu shah thung ne u Acting Syiem, “Ia u Acting Syiem, ki lah ban leh katba mon bad ym lah pat ban leh kumtei kumjuh. Weng noh shi bnai, ki lah ban leh ia katei”.
“Hynrei ia u Syiem uba lah shah jied, jied lyngba ka jingiaid ia ka riti dustur, nga sngew ba ha ka jingsngewthuh ka jong nga, ia katei ka ka rukom weng dei ban ialeh ban kiar” ong u Bah Chyne.
