Shillong, Jymmang 27 : U Myntri Rangbah ka Jylla Conrad K Sangma ha ka sngi Balang ula ong ba ka jingkiew dor ba dang shen jong ka petrol ka dei namar ki jinglong jingman ha ka pyrthei, khamtam ka thma ba dang iaid, haba kyntu ia ki nongshongshnong ba kin long kiba la pynkhreh ia kaei ka ban jia haba kyntait ba duna umphniang ha Jylla ia mynta.
“Ka jingkiew dork a petrol kumba phi iatip, ka dei namar ki daw jong ka thma kaba jia bad kane ka dei kaba ktah ia baroh kawei ka purthei bad kumta, ka ktah lut ia baroh” ong u Conrad.
“Kane kam dei kaba ktah tang ia ka Meghalaya lane ia ka ri India…ka dei kaba ktah ia ka pyrthei baroh kawei bad bun ki Ri, ha ka jingshisha, kila hap ban pyniaid da ka ration daka jingthew ia ka jingsam ia ka umphniang sha ki briew” ula ong.
U Conrad ula ong ba ka Jylla kam pat poi ha kane ka khep. “Ngim pat poi ha kata ka khep bad ngam khmih lynti ba ngin poi shata hynrei, ki jingbym thikna ki don hakhmat jong ngi, kumta ngi hap ban long kiba phikir bha” ula ong.
Haba kdew ia ka nongrim ba ieng ka Sorkar Pdeng, ula ong “Nga tharai ba kaei ka khubor jong u Myntri Rangbah Duh ka long, kam pat dei ka por ba ngin ia tieng, hynrei ngi hap ban peit ia kaei kaba ngi lah ban leh namar ka jingbym thikna kaba don”.
“Kaei kaba ngi lah ban leh kum ki briew ka long ba ngin pynkheh ia kaei ka ban jia bad ki jingbym thikna ki ba don hakhmat jong ngi” ula ong.
“Ka pork a por kaba eh, ngi kyntu, hooid ia ki nongshongshnong ruh ba ngi hap ban iadonlang, ngi hap ban ia ieng lang, kine ki dei ki por ba jynjar kiba ka pyrthei kala iakynduh” ong u Conrad.
Ula pynpaw ba ka dor jong ka umphniang ha Jylla ka dang long hapoh ka national average. “Na ka liang jong ngi kumba phi iatip, ba ka dork a dang long hapoh ka national average hynrei kat kaba ngi lah, ngin pyrshang ban peit ba kan ym dei ban don ka jingduna” ula ong.
Halor ki sienjam ban tehlakam ia ka jingpynkiew dor hi, ula ong “Ngin pynthikna ba kan ym don ka jingbuhrieh stock ne die tuh kiba lah ban kam sha ka jingkiew ka dor hynrei hooid, kumba nga ong, kane ka dei kaba jia mynta bad ngi hap ban iaid kumba ka long bad ngi hap pynkhreh ia ka jingbym thikna, hynrei ngi kyrmen ban gin lah ban iohi ia ki jingmih kiba bha ha ka pyrthei, watla ki long ki bym lah ban leh eiei, ngi kyrmen ba kiei kiei baroh kin sa long jai jai noh”.
Halor ka jingdawa ban pynduna ia ka khajna ka Jylla, u Conrad ula ong ba ka dor ka Jylla kala long lypa kaba rit. “Man ki Jylla ki lah ban pynduna ia ka khajna, ngi dei kiba rit bha haba nujor bad kiwei, hynrei kumba nga ong, ka ktah ia ka jingioh lum pisa ka Jylla ruh, ngi don ruh la ki jong ki jingpynlut ba ngi hap pyndap” ula ong.
