Shillong, Jymmang 27: Ka Sorkar Meghalaya ka la wanrah ia ka rukom pyniaid ba long ryntih na ka bynta ban ai jingmynjur, ka jingpeit bniah bad ban teh kyndon ia ki Private Nursing Institutions ha kylleng ka jylla.
Ka jingpynbna, kaba la pynmih da ka tnad ka Koit ka Khiah ha ka 27 tarik Jymmang, ka ong ba ia katei ka rukom treikam kaba thymmai la wanrah hapoh ka jingpyniaid jong ka Directorate of Medical Education & Research (DME&R).
Ka Sorkar ka la ong ba kane ka rai ka wan hapdeng ka jingkiew stet jong ka jingdon ki private nursing schools bad colleges ha Meghalaya ha kine ki phew snem ba la dep.
Katkum ka jingpynbna, ki jingsngewkhia ki la mih ha kaba ïadei bad ki jinglong jingman jong ki jingtei, ka jingdon jong ki nonghikai kiba tbit, ki jaka ai jinghikai ha ki jaka sumar, bad ka jinglong kaba shai haba iadei bad ka jingpdiang bad ka rukom siew bai skul.
Ka jylla ka la ong ba ka jingbud ryntih ïa ki kyndon jong ka Indian Nursing Council (INC) bad Meghalaya Nursing Council (MNC) ka la long kaba donkam ban pynneh ïa ka jinglong jingman jong ki private nursing schools bad ban pynthikna ïa ka jingshngaiñ jong ki shah sumar.
Hapoh kane ka rukom treikam kaba thymmai, yn thaw ia ka Meghalaya Nursing Education Regulation Authority (MeNERA) ka ban dei ka statutory body ba la ai bor ban ai ia ki jingmynjur, ban pynlong ia ki jingpeit bniah, ban pynbeit ia ki rukom siew bai pule, bad ban khmih iaki kyrdan pule.
Ka Sorkar ka la buh ruh ia ka rukom ai jingmynjur kaba don 5 bynta, kynthup ia ka jingpynshisha ia ka jingdonkam na ka tnad ka koit ka khiah, ka jingithuh da ka Meghalaya Nursing Council, ka jingpeit bniah katkum ka ain da ka Indian Nursing Council, ka jingiasoh bad ka skulbah bad ka jingpynrung ia ki Seat pule katkum ka state counselling matrix.
Ban pynbha ia ka kyrdan pule, ki jaka pule mynta kin hap ban bud ia ki kyndon kiba iadei bad ka jingdon nonghikai bad samla pule, clinical exposure, laboratories, simulation centres bad e-learning facilities.
Ka Frame Work ka bthah ruh ba don ka jingai jinghikai pyntbit iaki nonghikai bad ka jingpynmih iaka resol jong ki jaka pule bad ki samla pule man la u snem.
Ha ka jingpynkylla kaba kongsan, ka Sorkar kala bthah ba ki jaka pule kide ban don Placement and Career Guidance Cell ba khmih daki ophisar, bad ki jaka pule kin donkam ruh ban pynneh ia ka jingiadei bad ki hospital, ki seng treimon sngewbha bad ki nongsumar na ka bynta ki jingpynrung kam.
Ka rukom treikam ka pynrung shuh ruh ia ka jingpynbeit ia ka rukom siew bai pule, lyngba ka rukom jong ka jylla, katba ka khang ban phah siew man u snem ka jingsiew khlem jingbit bad ka jinglum khajna lypa.
La tyrwa ruh ia ki jingpdiang iaki samla pule katkum ka jinglah jong ki.
Ki heh sorkar ki la iathuh ba ia ki jingpeit bniah man ka por yn pynlong da ka Meghalaya Nursing Council bad ki skulbah ba iasoh, ryngkat ka jingpynshitom ba kynthup ia ka jingpynduna ia ka jingshim, ka jingpynsangeh ne weng noh ia ka jingithuh ia ki jaka pule ba la lap ba ki pynkhein ia ki kyndon.
Ka Sorkar ka la ong ba ia ki jingpynkylla yn pyntreikam ha ki bynta ryngkat bad ka jingpyntreikam mardor ia ki kyndon ba sdang.
