Nongpoh, Jymmang 27 : Hashuwa ban mih noh na Ri-Bhoi District ban leit shimti ia ka shuki Deputy Commissioner ka East Khasi Hills, u Abhilash Baranwal, ula ai sngewbha da ka Xerox machine bad ka kamra treikam ia u samla uba duna dkhot met kum ka lad ban aikam aijam bad kamai jakpoh.
Une u samla uba ioh ia ka jingai sngewbha na u Abhilash u dei u samla Pering Pale, khun I kong Minabe Pale bad Bah Will Syngkli na ka shnong Umpohwin. Kane ka kamra treikam ka dei kaba don hapoh ka Ophis u Deputy Commissioner ka Ri-Bhoi.
La plie ia kane ka kamra Xerox da ka MDC ka Nongpoh Kong Rona Khymdeit ha ka jingiadonlang ki Additional Deputy Commissioner Kong Balakyntiew Rani, Bah Jonathan Shylla nalor kiwei kiwei ki Ophisar.
Haba ai jingkren, U Abhilash ula pynpaw ba hadien ka jingkhmih bniah ia ka jinglong jingman une u samla, la shem ba une u samla u dei hok ban ioh ia ka lad jingiarap ha kaban kamai jakpoh bad ban kyrshan ym tang ilade hynrei ia ka iing ka sem. U ong ba ki bor District kila shim ia kane ka sienjam ban ai mynsiem ia une u samla da kaba pyniaid ia ka kam Xerox hapoh ka kyrpong jong ka Ophis u DC.
U Samla Pering ula pynpaw ia ka jingsngewnguh bad ka jingkmen kaba khraw ba un ioh ia kum kane ka lad ban kamai jakpoh lyngba kane ka jingiarap bad ula ai khublei ia u DC, ia u Additional DC Raja Brajma bad kiwei kiwei kiba don bynta ban plie lad lem ia u.
Une u samla ula pyndep ia ka kyrdan pule klas X bad ruh ia ka lain computer.
