Ki jingpynkylla ha ka pule dangle kin sa paw ha ka jingai kyrdan PGI, ong u CM

Kdew ia ka jinghiar kiba pep skul shiteng por bad ka tulop thymmai ki SSA

Shillong, Jymmang 27 : U Myntri Rangbah ka Jylla Conrad K Sangma ha ka sngi Balang ula ong ba ka jingtreikam jong ka sienjam bala shim ban pynkylla ia ka kam pule dangle ha kine ki lai-saw snembala leit kin sa sdang ban pyni ha ka Performance Grading Index (PGI) u snem 2025-26, kaba la khmih lynti ban mih ha u bnai Jylliew-Naitung.

“Ka kam pule dangle ka dei ka sobjek kaba kyllain bha bad ki don bun kiei kiei kiba la pynshong nongrim ha ka jingai kyrdan ka PGI” ong u Conrad.

Ula kdew ia ki jingeh ha ka rukom long ka pule dangle ha Jylla kaba la ktah ia ka jingioh kyrdan. “Ia ngi ban gin lah kum ka nuksa, ka jingdon ki skul hangne, kane ka long ka jingeh ia ngi namar ha kajuh ka Iingskul, ki don saw tylli ki skul kaba dei ban don tang kawei, hynrei ki don da ki jong ki UDISE number bad kila register bad ka Sorkar India bad ia ka jinglehbha jong ki la pynpaw kum ka jinglah baroh lang jong ka Jylla, kaba pynhiar ia u nombor” ula ong.

U Conrad ula ong ba ki policy ba dang shim dang shen ki dei kiba thmu ban pynbha ia ka jingioh kyrdan PGI. “Ki rai ba ngi shim, kum ka rai ban ai ia ka tulop ba pynbeit ryntih ia ki nonghikai SSA bad kiwei ki Nonghikai, ki dei kiba leh khang ban kyntiew ha ka PGI” ula ong.
Ula kdew ia ki jingpynjanai ha kiba bun ki bynta kiba kongsan.

“Mynta phim sa iohi ki kam kiba rit ba ria bala leh kum ka jingkiew ha ka jingpass ia ki eksam, ka jingpep skul shiteng por kala hiar palat ban ia ka national average kaba long 6%” ula ong.

Haba batai ia kiei kiba jia ha ki snem bala leit, u Conrad ula ong “Balei ka jingpep skul shiteng por ka kiew bha namar 50% na ki khynnah pule ki pheil ia ka SSLC, kumta ka jingkylli ba kin poi sha ka klas XII kam mih satia bad kane ka ktah ha ka jingai kyrdan ha ka PGI, ki don da ki jingai point ia baroh kiei kiei”.

Ula pynpaw ba ki jingpynkylla ha ka pule dangle ka shimpor ban pyni ia u soh. “Baroh ki kam bad ki rai ba ngi la leh ha ki 3-4 snem ban kyntur shakhmat ia ka pule dangle, ngin sa iohi ia ka jingtreikam ha ka jingai kyrdan ka PGI ha u snem 2025-26” ula ong.