Shillong, May 23: Ha ka sienjam ban kyntiew shuh shuh ia ka ktien tynrai Khasi bad Garo mynta la pynrung ha ka CBSE Scheme of Studies, kaba ailad ia ki skul kiba la pyniasoh ba ki khynnah pule kin shim kum ka Optional Third Language hapoh jongka Board’s New Language Framework na ka bynta u snem pule 2026-27.
Hapoh jong kane ka thup kaba la pynthymmai ha ka thup jongka CBSE OASIS Portal, ka Khasi kala shah buh ha ka nombar 46 bad ka Garo ha ka nombar 47 ha ka thup ki ktien hapoh jongka Three Language ba thymmai (R1-R2-R3) scheme kaban sdang treikam naduh u snem ban wan.
Kane ka jingkynthup kala wan hadien ba kala don ka jingsngewkhia ha Meghalaya hadien ba kham hashwa ym shim la kynthup ia kine ki artylli ki ktien tynrai na ki sobjek kiba la ioh jingithuh hapoh jongka polisi kaba la pynthymmai jongka CBSE. Ka sorkar jylla kala shimkhia ia kane ka mat bad ka Board bad ban pynlong ia ki jingiakren bad ki bor pyniad jongka CBSE.
Katei ka jingshimkhia kala paw ba kala seisoh.
Da kane ka jingpynkylla, palat 100 tylli ki skul kiba pyniasoh bad ka CBSE ha Meghalaya mynta kin lah noh ban ai ia ka Khasi ne Garo kum shi bynta jongka Third Language hapoh jongka Board scheme, ryngkat bad kiwei pat ki ktien kiba la ioh ia ka jingithuh.
Ka CBSE ka lah dep ban pynthymmai biang ia ka OASIS Portal kaba long kongsan ia ki skul kum shi bynta ban pyniaid shakhmat ia ka Language Policy hapih jongka National Education Policy and the National Curriculum Framework.
Kane ka sienjam kadei kaba la khmih lynti ba kan pynkhlain ia ka ktien tynrai ha ka pule puthi bad ban ai ka jingithuh ha ka jingpule ia ka ktien Khasi bad Garo hapoh ki skul ha ka ri India ha ryngkat bad ka kyrshan ia ka jingpyrshang kaba iar ban pynneh pynsah bad ban kyntiew ia ki ktien tynrai ki riewlum.
