Shillong, Jymmang 23: Ka Kerala ka la wanphai naka jingshah thep kol nyngkong ban pynliem ia ka Meghalaya da 2-1 kol ha ka quarterfinal jong ka Swami Vivekananda U-20 Men’s National Football Championship 2026 kaba la long ha Narainpur, Chhattisgarh.
U Mebanlamlynti Masharing u la ioh thep hapoh 20 minit na ka bynta ka Meghalaya hynrei ka Kerala ka la ïaleh ban pynphai kylla da kaba thep ar kol ban jop syndon.
Namar kata, ka Meghalaya kam shym la lah satia ban jop biang ïa ka Kerala kumba ka la jop ha ka U-20 Men’s NFC ha u snem ba la dep ha kaba jingïalehkai ka la kut noh da 2-1 bad jop ka Meghalaya.
Haka jingïakhun la ïohi ïa u Mebanlamlynti uba la thep 7 goal ha 5 tylli ki jingïalehkai bad u la mareh stet sha jan goal ha kaba u nongap goal ka Kerala u la mih shabar hynrei u Meban u la shim ia ka kabu bad u la ioh ban thep iaka goal da ka Bicycle Kick ban ailad ia ka Meghalaya ban tam ha ka minit kaba 17.
Hynrei ka jingbakla naki nongap bak ka Meghalaya lyngba ka jingpass biang u bak sha u nongap goal ka Meghalaya u Jovialstar L Lyngkhoi ka la plie lad iaka Kerala ha kaba u Sheril Thomas ula ioh ban thep ha ka minit kaba 26.
Ka Kerala kala dei ban thep biang lyngba u Calwin Thomas haka minit (44’) hynrei naka liang u nongap bak ka Meghalaya ula ioh lad ban Clear noh iaka bol.
Watla ka long ka jingduh mynsiem iaki nongialehkai ka Meghalaya kiba la don ha ka Chhattisgarh naduh ka taiew ba nyngkong jong u bnai Jymmang hynrei ki la ïalehkai bha da kaba jop ïa baroh 4 tylli ki jingïakhun ha ka Group A, pyrshah ïa ka Bihar ka jop da 3-1 ha ka 9 tarik Jymmang, iaka Jharkhand da 5-0 ha ka 11 Jymmang, iaka Andhra 8-1 haka 13 tarik Jymmang bad iaka Rajasthan 3-0 haka 17 tarik Jymmang.
