Shillong, May 23: U Myntri Rangbah ka jylla u Conrad K. Sangma hynne ka sngi Saitjain, ula leit hi dalade ban pdiang ia u samla ka Meghalaya ha kad liengsuin Guwahati Airport, hadien ba la wan ialam ia u na Jammu and Kashmir hadien ka jingkynnoh shah shimkabu bad shah thombor ha u trai kawei ka restaurant.
Une u samla uba la ioh ban pyllait udei uba la tip kum u Genal R. Marak uba na East Khasi Hills district, ia kaba la ong, ba ula trei ha kawei ka Restaurant ne jaka die bam ha Srinagar ha kine ki 3 snem kiba la dep ha ka jinglong jingman da ka jingshah shimkabu.
Katkum ka jingpyntip ka Sorkar Meghalaya, u Genal ula mih nala iing ha ka rta kaba dang 16 snem ban wadkam wadjam bad hadien ula leit sha Kashmir lyngba ka jingdon kiba iarap ia u. Ula ioh ia ka kam ban trei ha kawei ka Restaurant ha Srinagar hynrei la kynnoh pat ba ym shim la ioh ia ka tulop bad ula shah thombor ha u trai bad ha u khun jong u trai katei ka Restaurant.
Ia ka jingleit ban pyllait im ia une u samla, la sdang hadien ba la ioh pdiang ia ka jingtip lyngba ka phone da ka sorkar jylla lyngba ka 1971 CM CONNECT Helpline ha ka 24 tarik u iaiong 2026. Ki Ophisar kila ong, ba utei u samla ula pynpaw ia ka jingsheptieng bad jingkhuslai bad ula pynpaw ruh ba u don ia ka jingthmu ban bthat jubor noh ia la ka jingim lada um ioh ia ka jingiarap ha ka por kaba biang.
Hadien ka jingioh pdiang ia katei ka jingujor, ka kynhun jongka CM CONNECT kala iatreilang bad ki ophisar bad ki bor khmih ia ka ain jong ka jylla Meghalaya bad Jammu and Kashmir ban leit wad bad ban pyllait im ia utei u samla.
Ka kynhun kaba kynthup ia u Assistant Labour Commissioner bad ka Anti-Human Trafficking Unit ha Jammu and Kashmir hadien kala ioh ban pyllait im noh ia u Genal na Srinagar tang hapoh katto katne kynta jong ka jingtuklar, la ong ki ophisar.
Ka sorkar Meghalaya kala phah ruh ia u Magistrate ban khmih ia ka rukom pyniaid ia ki kam ki jam bad ban pyniasoh biang ia une u samla bad ki bahaiing bahasem ki jongu. Ka kmie jongu Genal ka Surobi R. Marak ryngkat bad ki bahaiing bahasem bad u Magistrate u Sanjay D. Shira, kila leit ban wan ialam noh ia u Genal da kaba shngain sha la iing. Ki bor kiba dei khmih kila pynthikna ruh ba dei ban pyllait lut ia baroh ka tulop kaba dang sahteng ka jongu.
Haba kren hadien ba la pdiang ia une u samla ha Airport, u Conrad Sangma ula ong, ba kane ka jingjia ka pyni ia ka jinglah ban pyntip bad ka jingshimkhia bad ka jingtreikam mardor kaba la lah ban iada ia ka jingim.
“Kane kadei ka kam kaba suk, kaba lah ban ai jingshakri lyngba ki kor ki bor bad nga dap da ka jingkmen ba ka CM Connect ka lah ban ai ka jingshakri bad ban iarap ha kaban iada ia ka jingim jong u riewshimet” la ong u Myntri Rangbah.
Ka Sorkar Meghalaya kala ong, ba katei ka jingjia ka pyni ruh ia ka rukom treikam jong ka 1971 CM CONNECT kaba long ka rynsan ym tang ban pynpaw ia ki jingsngewkhia bad ia ki jingeh hynrei ban long ruh ka atiar ban ai jingkyrshan ia ki nongshong shnong kiba shem jingeh bad jingjynjar.
