Agartala, Risaw 01 : U Secretary ka CPI-M ha Tripura u Jitendra Chowdhury hynnin ka sngi Thohdieng ula kynnoh ia ka sorkar synshar BJP ha ka jylla halor ka jingpyndonkam da baroh ki jingdon jingem jong ka sorkar pdeng na ka bynta ban wan ha ka bor ha kane ka jylla ha u 2018.
Utei u nongialam ka CPI-M ula ong; “Ha ka jingiaksaid ban pynkhyllem ia ka Left na ka bor synshar, ka BJP kala pyndonkam da baroh ki jingdon jingem jong ka sorkar pdeng, kata da kaba phah ruh ia ki nongialam ba hakhliehduh jong ka party sha Tripura khnang ban lah ban khring ia ki vote.
“Ban khroh ia ki paidbah kila pynmih ia shibun bah ki jingkular hynrei na ka liang ki paidbah mynta kila sdang ban ngiah ia ka BJP namar ki kam thok kam shukor ki jong ka pyrshah ia ki paidbah nongshong shnong ka Tripura,” ong utei u nongialam ka CPI-M.
Da kaba kynthoh tyngeh ia ka BJP, utei u nongialam ka CPI-M ka Tripura ula ong; “Nalor ba kim shym la don ia ka mon ban pynurlong ia ki jingkular ki jong ka bad kim shym la pyrshang ruh ha kaba iadei bad kane ka bynta.”
“Katba ki sngi ki bnai kila nang jan, kumta ruh sa shisien pat kila wan ha ryngkat ki jingkular bad ki jingialap kiba thymmai, hynrei kiei kiei kiba don shapoh ki long kumjuh,” ong shuh shuh utei u nongialam.
Da kaba kam ba ka BJP kala pulom ha baroh ki liang, u Chowdhury ula ong; “Ai ha nga ia kawei ka nuksa ban ngeit ia ki.Kaei ka kam ba bha kaba kila leh? Ki khynnah pule, ki samla, ki nongbylla sngi, ki nongrep, ki kynthei bad ka imlang ka sahlang kim don jingshngain ha ka jingsynshar jong ka BJP.”
“Ki paidbah kila long kiba la kloi ban ai ia ka jubab pyrshah ia ka BJP ha kine ki sngi ki ban dang wan,” ong shuh shuh uneu nongialam ka CPI-M.
