Itanagar, Risaw 01 : Ka Arunachal Bachao Andolan Committee (ABAC), ha ryngkat ka jingiatreilang bad ka All Capital Complex Youth Welfare Association (ACCYWA), kila pynlong ia ka rally ban dawa na ka sorkar jylla ba ka dei ban kem noh mardor ia u Akhilesh Pratap Singh bad ruh ban phah tohkit CBI halor ki jingkynnoh kam bamsap pyrshah ia u Myntri Rangbah (CM) ka jylla u Pema Khandu.
Ha kane ka jingiaid rally ba la pynlong hynnin ka sngi Thohdieng na Akashdeep sha IG Park la wan iashim bynta da ki spah ngut ki paidbah.
Hadien ka jingpulom ban pynsngap ia kane ka jingdawa hapoh ki 14 sngi, kumta ruh na ka liang kitei ki kynhun seng kila byrthen ban pynlong da ki jingiakhih kiba katkum ki lynti synshar paidbah, kata ki ban kynthup ia ka jingkhot pakhang shnong.
Haba kren sha ki lad pathai khubor, u president ka ACCYWA u Ashok Yangfo ula ong ba u Khandu u dei ban aiti mardor sha ka CBI na ka bynta ban pynlong ia ka jingtohkit halor ki kam bamsap ba la kynnoh da ka Arunachal Against Corruption (AAC), kata halor ka jingpyndonkam bakla ia ka pisa sorkar bad halor ki jingdon jingem jong u CM kiba long palat ban ia ka jingioh .
U Yangfo ula kam ruh ba ia baroh ki jingtrei jong ka sorkar hapoh Tawang ki dei kiba la pyntrei da ka kompeni jong u CM lane na ka iing ka sem ka jong u.
Da kaba khanglad ia ki samla ka jylla, u CM uba mihkhmat na ka bynta baroh ki paidbah u dei ban kair na kiba kum kine ki jingtreikam ba shimet bad ban plielad na ka bynta kiwei ruh kumjuh.
“Lada u CM u lah ban ai ka jingmynjur na ka bynta ka jingtohkit CBI halor ka jinglait tuh ki jingkylla APPSC eksam, balei un kiar na kaba phah tohkit CBI halor ki kam bamsap ba la kynnoh pyrshah ia u?U CM u dei ban phah tohkit mardor ha ka tnat CBI bad ED halor kine ki jingkynnoh,” ong shuh shuh utei u president.
Ha kawei pat ka bynta, u General Secretary ka ACCYWA u Lomjum Boje ula ong ba u Akhilesh Pratap Singh, uba dei na ka jylla Uttar Pradesh la kynnoh ba ula pynmih ki jingkren kynthoh pyrshah ia ka nongtrei kam bhalang ka Toko Sheetal.U Singh ula pynthut ia ka jingiaid paidbah da ka kynhun ka AAC.Kumta ruh u dei ban shah kem mardor hadien ba la ujor FIR pyrshah ia u.
U Boje ula ong ruh ba na ka liang ka sorkar jylla ka dei ban pynioh ia ka jingbishar hok da kaba pdiang ia kine ki jingdawa jong ka AAC.Wat hadien ki jingiakhih kiba la bun bun sngi ha ka nongbah New Delhi da ki kynhun bad ka jingiaid kjat na Arunachal sha New Delhi, hynrei na ka liang ka sorkar kam pat shym la shah shkor satia ia kine ki jingdawa ki jong ki.
