Shillong, Jymmang 22 : Ka Drug Reduction, Elimination & Action Mission (DREAM) ka shaniah tylli ha ka bor jong ki samla ban iakhun pyrshah ia u droks bad 33 ngut ki samla pule ka William Carey University kila lamkhmat ha ka jingialang pynsngewthuh paidbah pyrshah ia u droks lyngba ki drama lyngkot, ki jingrwai bad ki jingshad.
Ia kane ka jingialap pyrshah droks ba la pyniaid ha ryngkat ka jingiatreilang bad ka Bosco Integrated Development Society (BIDS), la pynlong ha ki thain Police Bazaar, Iew Mawlong hashuwa ban pynkut ha Nongmensong hynne ka sngi Thohdieng.
Ka DREAM ka ong ba mynta ka dang pyniar ia ka prokram internship jong ki samla pule, bad ka la buh ïa ka kum ka bynta kaba kongsan tam ban pynlong ïa ki samla kum ki nongïalam hapdeng para samla ha ka jingïakhun pyrshah ïa jingdih drok.
Ka bynta kaba kongsan tam jong ka program ka dei ka skit, kaba la bynta bad pynwandur bha kat kum ka DREAM Calendar. Kane ka calendar ka don ia u QR code uba ailad ia ki nongdih droks ba kin ioh jingtip shaphang ki rehabilitation centre bad ki briew bad nombor ba ki lah ban kren.
“Lyngba kane ka skit, ki interns, ym tang ba ki pynsngewthuh paidbah shaphang ka jingma jong u drok, hynrei ki la ai ruh ïa ki lad ki lynti ban pyndonkam haba donkam jingïarap” ong u Director ka DREAM.
Ula ong ba ka Misson kala shimkhia ia ka rukom treikam kaba pynkupbor ia ki briew bad ki longiing ba kin lah ban ioh jingiarap bad jingiasyllok, ka jingïarap ban pynduna ïa ka jingsngew lehraiñ lane jingïakhein poh halor ka jingngop ha u drok bad ban wad ia ka jingsumar, bad ban pynphriang ia ka khubor ba ka jing iarap ka don bad ka don ka lad ban ioh biang ia ka jing joit jing khiah.
Lyngba kane ka prokram internship, ki samla pule kila ioh jinghikai ba kin lah ban ialam da lade ia ki awareness campaign ha ki skul bad ki kolej, kin long kum ki nongai jingmut ne nongïasyllok ïa ki paralok jong ki, khamtam ia ki ba lah ban ngop ha une u jingsniew.
“Da kaba pynlah ia ki samla pule ban ialam hi dalade ia kine ki jingpynsngewthuh paidbah. Kane ka internship program ka thaw ia ka rukom iada kaba kham myntoi bad kaba neh shyrta hapdeng ki samla” ong u Bah Kharshiing.
Ka prokram ka tei ruh ia ka jingshaniah ha lade, ban long nongïalam, ka jingnang ban ïakren, bad ka jingsngewthuh kaba kham khlaiñ ïa ka jingthmu lyngba ka jingïatreilang bad jingïashim bynta ha ka imlang sahlang.
“Ka DREAM ka ngeit ba ka jingdon ki paralok kiba bha ka long ka bynta kaba kongsan ha kaba pynwan dur ia ka jinglong jingim, khamtam hapdeng ki samla” ong u Bah Kharshiing.
Ym kum ki prokram pynsngewthuh ba ju long kiba shaniah ha ki jinghikai ba shiliang, ka rukom treikam jong ka DREAM ka pynleit jingmut ha ka jingïashim bynta ba radbah jong ki samla bad ka jingïadei bad ki paralok.
Da kane ka jingthmu, ka DREAM Mission ka pynkupbor ia ki samla pule ban long ki Nongmihkhmat Pyrshah ia u Drok hapoh la ki jong ki skul, ki kolej, bad ki shnong ki thaw.
U Bah Kharshiing ula ong ruh ba ka DREAM ka thmu ruh ban pyniar ia kane ka jingthmu ha ki bnai ban wan da kaba pynrung shuh shuh ia ki samla pule na kiba bun ki college kiban long kita ki “shipai jong ki Nongmihkhmat Pyrshah ia u Drok”—kiba dang iai bteng ban pynkhih, ban ai mynsiem, bad ban trei kum ka bor kaba bha hapoh ka imlang sahlang.
 ka shaniah tylli ha ka bor jong ki samla ban iakhun pyrshah ia u droks bad 33 ngut ki samla pule ka William Carey University kila lamkhmat ha ka jingialang pynsngewthuh paidbah pyrshah ia u droks lyngba ki drama lyngkot, ki jingrwai bad ki jingshad.){kind=link}