Shillong, Nailur 25: Ki nonghikai Deficit ki la maham ia ka jingiakhih kaba jur ha ka jylla baroh kawei lada ka Sorkar jylla kam lah ban pynbeit ia ki hynriew tylli ki mat jingdawa haduh 9 tarik Risaw.
Ïa kane ka jingmaham da u President ka Khasi Jaintia Deficit School Teachers’ Association (KJDSTA) u Bah Boswell Pala hadien ba la pynlong ïa ka jingïaid paidbah na ophis MBOSE shaduh madan Malki.
Ïa kane ka jingïakhih la pynlong lang da ka KJDSTA bad ka Garo Hills Deficit School Teachers and Employees Association (GHDSTEA).
Haba pyntip ba ka KJDSTA bad ka GHDSTEA ki la aiti daka dorkhas sha u Myntri Rangbah ka Jylla u Conrad K Sangma, u Bah Boswell u la ong “Ngi la thoh sha ka Myntri Rangbah ban pynurlong ia kine ki mat jingdawa. La jan shibnai ka la ïaid naduh ba ngi la pan por ba iakynduh ia phi hynrei ka jingkyrpad jong ngi ka la ïakynduh ïa ka jingbym shimkhia naka liang jong phi”.
“Da ki snem, ki skul Deficit ki long ki rynsan ban kyntiew iaka pule puthi jong ka Meghalaya hynrei kila mad ïa ka jingeh kaba jur ha ka liang ka pisa tyngka, ka jingbym shimkhia jong ki bor synshar, bad ka jingbym shimkhia ha ka rukom treikam,” u la ong.
Halor ka jingsiew DA, u la ong ba ki nonghikai ki dang shah siew 49% ka DA watla 51% ka dei ban ioh naduh ka 1 tarik u Naitung 2025 bad 53% naduh ka 1 tarik Kyllalyngkot 2026, nalor 43% ki arrears na ka bynta u bnai Kyllalyngkot bad Rymphang 2024.
Halor ka CPF, u Bah Boswell u la ong, “Katkum ka hukum jong ka 21 tarik u Naiwieng 2024, la pynkiew ïa ka jingnoh synniang kaba ïahap sha ka 10% naduh ka 1 tarik Kyllalyngkot 2025. Haduh mynta, ki nongtrei ki dang ïoh tang 8%. Ngi dawa ban pyntreikam mardor ryngkat bad ki jingsiew Arear ba dang sahteng”.
Ka KJDSTA bad ka GHDSTEAi ki la dawa ruh ban pyndap mardor ïa ki kam ba thylli sahteng na ka bynta ki kam nonghikai bala shongthait, ban pynsangeh noh ïa ka jingpynkylla ïa ki kam nonghikai naka Deficit shaka SPF, ban pyllait iaki nonghikai na ka Centralized Provident Fund Scheme 2026, ban wanrah biang ïa ka Board of Trustees katkum ka aiñ jong u snem 1969, bad ban ban pyntreikam haka por kaba biang iaka CPF bad NPS.
“Lada baroh ki jingdawa kiba dei hok kim lah ban pyndep haduh ka 9 tarik Risaw ngin nym don lad shuh da kumwei satang ban pynlong ïa ki jingïakhih kiba jur ha baroh kawei ka jylla. Kano kano ka jingpynthut ïa ka pule puthi jong ki samla pule kan shong pura ha ka jingbym leh eiei bad jingbym shimkhia jong ka Sorkar,” la maham u Bah Boswell.
