Shillong, Jymmang 22 : U Deputy Commissoner ka East Jaintia Hills, ula pynsangeh ia ka public hearing halor ka project tih mawshun jongka kompani Shree Cement Ltd ha Lum Syrman, Daistong, hadien ka jingpyrshah kaba jur na ki kynhun sengbhalang bad ki paidbah kiba khlem ailad ban pyniaid ia ka hearing.
Shuwa kane, kawei ka trok ba suba jur ba ka dei jong ka kynhun kaba kyrshan ia ka Shree Cement, kaba pakhang lynti ia ka surok ban leit sha ka jaka ba pynlong ia ka hearing, kala shah wiang ding ha ki kynhun kiba ieng pyrshah ia ka project.
Ki bor District kila hap ban pynsangeh noh ia ka hearing hadien ba baroh arliang kynhun kiba don ha kane ka jaka kila pyr shah ban pyniaid ia ka hearing.
Kane ka rynsan public hearing kala sawa jam da ka jingpyrta slogan “Go Back Shree Cement” na ka kynhun kaba pyrshah ba kynthup ia ki Sengbhalang.
“Ka jinglong jingman ka suk ka sain ka long kumba ju long. Baroh ar kynhun manla kim shym la ailad ia ka public hearing ba kan iaid shakhmat, khamtam kito kiba pyrshah ia ka. Namar kata, ym shym la lah ban pyndep ia ki bynta kiba hapban leh bad la pynsangeh noh ia ka hearing” ong u Superintendent of Police Pankaj Kumar Rasgania lyngba ka phone.
Kat kum ka jingong une u Heh Pulit, kaweika trok ba don u nombor ML04-B-2910 kala shah thang ha ki kynhun kiba ieng pyrshah hadien bas hem ba kane ka trok kala ieng hapdeng ka surok bad pakhang ia ka lynti iaid.
U SP ula ong “Kane ka jingthang trok kam shym la jia ha ka jaka ba pynlong ia ka hearing hynrei ka dei kaba jia ha lynti. Kane ka jia hashuwa ban poi sha ka jaka ba don ka hearing. Katto katne ki briew, ha ka por ba ki wan sha kane ka hearing,kila lap ia kane ka trok (bad kila wiang ding ia ka).
“Ngin dang ban pynthikna kiei kita ki briew ba wiang ding bad kane ka trok ka dei jong no” ula bynrap.
Halor ka jingkynnoh ba kane ka trok kala pakhang lynti ia ka surok, u Rasgania ula ong “Ngim pat thikna ia kane namar ia ki Pulit la buh ha ka jaka ba don ha hearing. Ka jingtohkit ia kane ka jingjia kala iaid shakhmat ban tip balei kane ka trok ka don ha kane ka jaka bad ka dei ka jong no”.
U SP ula iathuh ba ka jinglong jingman ia mynta kala long biang kaba jai jai.
“Kam shym la don kano kano ka jingkulmar. Ia mynta, ka long kaba jai jai bad ki briew kila iamih da kaba suk ban leit phai shala iing namar la pynsangeh noh ia ka hearing” ula ong.
