Shillong, Risaw 1: Ka kurim u Vice President ka BJP bad MDC ka Tura Bernard N Marak ha ka sngi thohdieng ka la buh ia ka jingkyrpad ia ka Iingkashari Meghalaya High Court ban ai noh ia ka jamin ba mardor.
Ia kane ka jingkyrpad bah jamin la buh da ka kurim ka LK Gracy, ong ka khubor haba pyntip ba ka Iingkashari ka la sngap ia baroh ki jingkyrpad jong u nongiasaid ka nongpan jamin bad ia u nongiasaid ka sorkar. Hynrei ka Iingkashari kam pat pynmih satia ia ka hukum.
U Bernard ula shah kem ha ka 26 tarik Naitung na Hapur District jong ka Jylla Uttar Pradesh, hadien ka jingphet na kti ka ain halor ka jingkynnoh pyniaid ia ka ktem awria ha ka farm house shimet jong u, ka ba lam sha ka jingioh pyllait ia 5 ngut ki khynnah bad kem ia 73 ngut ki briew.
Kane ka la jia hadien ba ki pulit ka West Garo Hills kila pynmih ia ka lookout notice sha baroh ki police station ha kylleng ki Jylla ka Ri ban lapdien ia une u MDC ka BJP.
Ia u Bernard lah ioh kem da ki pulit ka Uttar Pradesh halor kane ka lookout notice ba lah phah da ki pulit ka jylla, katba ki dang khynra kali ha surok National Highway.
Ka ïingkashari na West Garo Hills ka la pynmih ia ka non-bailable warrant of arrest pyrshah ia u Bernard Marak, uba dei ruh u chairman ka kynhun kiengatiar Achik National Volunteer Council – Breakaway (ANVC-B) ba lah pynduh pyndam.
Ia u Bernard lah pynngat ha ka kyndon jong ka Immoral Trafficking (Prevention) Act, 1956 bad ia ka case la register ha Tura women police station.
Une u Nongialam ka BJP ula kyntait war ba u pyniaid ia ka kam arwia ha ka farm house jong u ba lah tip kum ka ‘Rimpu Bagan’.
