Shillong, Jymmang 20 : Ki kynhun Sengbhalang bad ki trai shnong ka Daistong ha ka sngi Balang, kila iatur paidbah bad rung jubor hapoh ka Ophis u Deputy Commissioner ka East Jaintia Hills ban pynpaw ia ka jingpyrshah kaba jur halor ka public hearing jong ka project tih mawshun ka kompani Shree Cement ha Lum Syrman.
Ki nongiakhih kila pyrta slogan bad rung jubor shapoh ka Ophis ban dawa pyndam syndon ia ka public hearing kaba la pynbeit ban long ha ka 22 tarik Jymmang.
Kila maham ruh ba lada ai jingbit ia ka jingtih mawshun ha ka jaka ba 217 hectare, ka jingjot kaba khraw kan wanrah ia ka mei mariang, ki lyngkha rep kba bad ki krem ki kroh kiba don ia ki khana pateng hapoh ka thain.
Kila kam ruh ba kane ka project ka buh ia ka jingma kaba khraw ia ka kamai jakpoh jong ki nongshongshnong kiba shaniah ha ka rep ka riang bad ki jingdon jingem ha ka mariang.
Kila kynnoh ruh ba ka Sorkar kala pyrshang ban pyndonkam da ki buit ban pyntieng pynmiej bad iaid lait ia ki kyndon ain kynthup ka Meghalaya Land Transfer Act, haba pyniaid shakhmat ia kane ka project.
Haba maham ban leh tyngeh, ka kynhun kala pynbna ba kin sa nang pynkhlain ia ka jingiakhih bad kin sa khang lynti ruh ia ki nongtrei Sorkar lada ki bor district ki pyrshang ban pyniaid beit shakhmat ia kane ka public hearing wat hapdeng ki jingpyrshah na ki trai shnong.
