Shillong, Jymmang 20: Ki pulit ka East Khasi Hills ki la maham ia ki trai kali, ki bym pynthymmai ia ki kot ki sla kali ban pynthikna iaka jinglong trai hadien ba la die ne thied, bad pynpaw ba ki Pulit kin dang iai bteng ban talasi bad kiba pynkhein kin ngat ha ka jingpynshitom katkum ka ain niah kali.
Ka kyrwoh ba la pynmih da u Superintendent of Police (SP) Bah Vivek Syiem, ka la ong ba la ïohi ba ha kiba bun ki khep, ïa ka jinglong trai ïa ki kali ym shym la pynkylla lyngba ki kot ki sla hadien ba la dep die ne thied kali.”
“Kum kine ki rukom leh ki buh jingeh ban buh ïa ki jingthoh ba thikna halor ka jinglong trai iaki kali bad ban tynrong ia ka jingkitkhlieh ha ki jingjia kiba ïadei bad ki aksiden, ki jingpynkheiñ iaki aiñ niah kali, lane ki kam runar,” ong u SP.
Ki pulit ki la pynkynmaw ia ki paidbah ba ka jingpynkylla ia ka jinglong trai iaki kali ka long kaba kongsan katkum ka Section 50 jong ka Motor Vehicles Act, 1988
“Ki nongdie bad nongthied ki dei ban pynthikna ba ka jingpynkylla ia ka jinglong trai iaka kali dei ban pyndep hapoh ka por ba la buh ha Ophis District Transport Office. “Ka jingbym lah ban pynkylla ia ka jinglong trai kan wanrah ia ka jingshah pynshitom katkum ka ain Motor Vehicles Act” la bynrap.
U SP u la ai jingmut ia baroh ki trai kali ban: pynthikna ia ka jingpyntreikam hok ia ki kot ki sla jong ka jingpynkylla ban long trai iaki kali ha ka por ba die/thied, ban aiti ia ki phorm bad ka bai pynthymmai shaki bor ba khmih khlem da pynslem bad ban pynshisha ba ka Registration Certificate (RC) ka pynpaw ia ka jinglong trai ba la pynthymmai.
Ka kyrwoh ka la kdew shuh shuh ba ka jingpynjari iaka ain kaba pyrkhing bha la pynlong man ka por lyngba ki Mobile Court bad ki jingpynjari ain ha kylleng ka District.
“Ka jingiatreilang jong ki paidbah ka long kaba donkam bha ban pynneh ia ki jinglong trai ba thikna jong ki kali, ban pynthikna ia ka jingkitkhlieh, bad ban kyntiew ia ka jingshngain ha surok” la ong ka khubor.
