Shillong, Nailur 30: Ka Co-curricular Academic Development Committee bad ka Department of Environmental Science, jong ka Shillong College kila pynlong iaka National Conference kaba ar sngi halor ka mat “The Issue of Electronic Waste: Environmental Concerns, Management and Opportunities for Entrepreneurship” bad ia kane ka jingialang la pynhap pyrda noh hynne ka sngi.
Ka MLA jongka East Shillong ka Dr. Mazel Ampareen Lyngdoh kum ka kongsan haba kren haka jingialang, kala pynpaw iaka jingdonkam ban iatai ia kane ka mat kaba kongsan.
Kala ong, ba ka jylla Meghalaya ka dang shu sdang iaid ha kane ka bynta ban shimkhia iaka mat kaba iadei bad ka e-waste bad e-waste management watla ki tnad sorkar ki bapher kila shimkhia ia kane ka mat naduh u snem 2009 haduh mynta.
Ka Kong Ampareen kyntu ia ki riewshimet bad iaka imlang sahlang ban shimkhia lem iaka jingdonkam kyrkieh ban ha kaban pynsngewthuh ia baroh kiba don bynta lang bad kala ai jingiaroh iaka Shillong College kaba la shim ia kane ka sienjam kaba donkam da kaba pynlong iaka jingialang ban thaw ia ki lad ki lynti bad iaki sienjam ha kaban iakhun ia katei ka jingeh jong ka e-waste bad e-waste management ha ka jylla bad ka kyntu iaki nongpyniaid ia katei ka prokram ba kin aiti da ka kaiphod sha ka sorkar jylla khnang ba katei ka mat kan ym kut noh tang ha ka jingiatai haka jingialang.
Ki riewshemphang kiba la wan iashimbynta ha katei ka jingialang ki kynthup ia
Prof. D. Paul, Professor, Department of Environmental Studies, North-Eastern Hill University, Shillong, ka Dr Paromita Chakraborty, Associate Professor, SRM Research Institute, Kattankulathur, Chennai, ka Priti Mahesh, Chief Programme Coordinator for Toxics Link, New Delhi, u D.P. Pabhu, Co-founder Respose Waste Management and Research Private Ltd., Mumbai, u Miraz Ahmed, Director, Terra Matter Initiative Private Limited, Guwahati. Bah Frankie Ryntathiang, Deputy Manager, MIE/PRIME Startup Hub, Shillong bad kiwei kiwei.
Ha ka sngi pynhap pyrda iaka jingialang la pynlong ruh iaka jingikob tai nia halor ka mat “Electronics Improve or Worsen Students Learning Environment” ia kaba la wan ban iashimbynta da ki samla pule na ki 10 tyli ki College ka jylla.
