Shillong, Jymmang 19 : Ka Langsning FC ka la lah ban pynliem ia ka Nangkiew Irat FC da 6-1, ha ka jingiakhun jong ka quaterfinal league ka 5th Meghalaya State League, kaba long artad ka jingjop kaba 10 sien lynter jong ka kynhun, ha ka jingiakhun kaba la long ha SSA Stadium, Polo.
Katba ha ka jingiakhun kaba ar, ka Rymbai Shkenshynriah SC ka la lah ba kan pynliem ia ka Maram FC da 4-2.
Haba phai biang sha ka jingiakhun ba nyngkong jong ka sngi, u Nelson Rymbai ula ioh hattrick na ka bynta ka Langsning da ka jingioh thep ia ki kol ha ka minit ba 69′, 73′, bad 87′ ia kaba la bynrap lang shuh shuh da ki kol ba la thep da u Samuel Phawa (18′, 21′) bad u Morningstar Khongkiang (58′).
Katba ia ka shi kol jong ka Nangkiew Irat FC ban lait brut na kane ka jingiakhun, la ioh thep lyngba ka freekick ba la shut da u Ronaldkydon L Nonglait (27′).
U Nelson, da kine ki lai kol kiba u la ioh ban thep mynta ka sngi, ula ioh ban thep haduh 21 tylli ki kol ha kane ka lympung iakhun, ha kaba ym don ruh kawei ka jingiakhun jong ka Langsning FC ba un ym ioh thep ia ki kol.
Ha ka jingaikhun kaba ar jong ka sngi, ia ki saw tylli ki kol ka Rymbai Shkenshynriah SC la ioh ban thep da u Hesmiki Rymbai (28′), Monush Lapang (31′), Skilful Tariang (61′) bad Niphonghi Sumer (78′), katba ia ki ar kol ka Maram FC la thep ia ki da u Santosh Teron (50′) bad Jakchim K Marak (88′)
Haba ia phai sha ka miej iakhein point, ka Langsning FC mynta ka la ioh ba kan khur 9 point bud pat sa ka Shkenshynriah kaba don ha ka kyrdan kaba ar da ka jingioh khur 6 point, ka Nangkiew Irat ka don haka kyrdan kaba lai da ka jingioh 3 point bad ka Maram FC kam pat shim la lah ban ioh khur satia ia ka point (0).
Lashai ka sngi, ka jingiakhun kan dei jong ka Group A kaba dei artad ka jingsdang jong ka kylla kaba ar (second leg) jong kane ka quarterfinal.
Ka jingiakhun ba nyngkong kan long hapdeng ka Mawlai SC pyrshah ia ka Rangdajied United FC ban long ha ka por 2 baje nohphai sngi, bud pat da ka jingiakhun ka Nongkseh SSCC pyrshah ia ka Shillong Lajong FC kaban long haka por 6 baje janmiet.
Kumban shu pynkynmaw ba kine ki saw kynhun ki dang shu dep ban iakhun hynnin ka sngi ha kaba ka Mawlai ka la jop da 2-1 ia ka Rangdajied United F C, katba ka Nongkseh SSCC ka la pynliem da 2-0 ia ka Shillong Lajong FC.
