Iaid paidbah bad thang mombiti ha Nongpoh ba shah pyniap ka samla
Nongpoh, Nailur 30: Ki Kynhun Sengbhalang kila dawa ba dei ban rai da kaba sdien phasi ia u runar uba pyniap dusmon ia ka samla lud ha Pahamsyiem haba byrngem ruh ba ym dei ban don ki nongleit bah jamin ia une u runar.
Kane ka jingdawa kala mih na ka Joint Action Committee jong ki saw tylli ki Sengbhalang ba kynthup ia ka KSU, RBYF, FKJGP bad HNYF, kaba la pynlong ia ka jingiaid paidbah bad rah lama iong hynne ka sngi thohdieng ha Nongpoh bad la pynbud da ka jingthang mombiti ha ka por janmiet.
Kumban shu pynkynmaw, kawei ka samla lud ba kyrteng ka Nisha Nongbet, kala shah pyniap dusmon ha uwei u briew ba ka iashong iasah lang uba dei u bar Jylla bala tip kyrteng u Dilbahadur Thapa. Une u briew ula pyniap ia kane ka samla da kaba ot na ryndang bad dung da ki kynja tiar ba nep.
Kane ka jingiaid paidbah bad rah lama iong kala sdang naduh ka shnong Iewmawlong shaduh ka Nongpoh Urban Shopping Complex bad hangne la pynlong ia ka jingthang mombati ban pynpaw ia ka jingsngewsih bad ka jingsngewlem halor katei ka jingjia.
La wan ban ia shimbynta ha kane ka prokram da u Bah Ferdynald Kharkamni, president ka KSU, North Khasi Hills, u Bah Marcus Marten, president ka HNYF, Northern Region, u Bah Phrangsngi Kylla, Finance Secretary ka RBYF, Sengkmie, u Bah Ricky Majaw President ka FKJGP, Nongpoh Circle, nangta u Bah CB Syiem, Chairman ka Nongpoh Town Committee, u Samla Anthony Suchiang, Secretary ka Dorbar Shnong Nongpoh bad kiwei kiwei ki riew pawkhmat ka thain Nongpoh.
Ha kane ka jingiaid paidbah bad prokram thang mombati la shimbynta ruh da ki nongialam shnong na ki shnong bapher bapher, ki Seng Longkmie bad Seng Samla bad ki khynnah skul ka thain Nongpoh kiba la pynrem jur ia katei ka jingjia kaba sngewsih.
Ki nongkren ha ka jingialang ba la pynlong hadien ka jingiaid rally, ki la pynpaw ia ka jingsngewsih kaba kthang mynsiem halor ka jingnang kiew ki kam thombor ia ki kynthei khynnah ha kane ka district khamtam ka jingpynibor da ki bar jylla pyrshah ia ki trai ri trai muluk kiba la nud ruh wat ban shim ia ka jingim ba kordor jong ki shipai ka jaidbynriew khasi khara da kaba pynrem jur ruh ia katei ka jingjia kaba sngewsih kaba la jia pyrshah ia ka samla Nisha Nongbet.
Kine ki Nongkren kila dawa na ki bor ka ain ba ki dei ban rai pynrem noh ia u Dilbahadur Thapa u ba la donkti ha kaban pyniap jubor ia katei ka samla khasi da kaba rai ban phasi beit ia u.
Kila byrngem ruh ia kino kino ki nongleit bah jamin ia u tei u runar ba ki paidbah kin ym map satia hynrei kin sei madan bad ai ka jingpynsajia da kaba shu shyit haduh ban da jem jai.
