Shillong, Jymmang 18: U President ka BJP Meghalaya u Rikman G Momin ha ka sngi Nyngkong ula ialam ia ka kynhun jongka Federation of Licensed Exporters of Meghalaya ban iakynduh ia u Myntri ka Sorkar Pdeng uba khmih ia ka Commerce & Industries u Piyush Goyal, ban kyrpad ia ka sorkar pdeng ba kan tuklar na ka bynta ban pynsuk noh ia ki jingeh kiba ktah ia ka khaii ma pateng hapdeng ka ri India-Bangladesh lyngba ka jylla Meghalaya.
“Kane ka kynhun kala ioh ban iatai sani bha bad u Myntri halor ki mat ki bapher bapher kiba iadei bad ka khaii pateng ha ki thain khappud jong ka ri India bad ka Bangladesh lyngba ka jylla Meghalaya,” la pynpaw ka seng BJP ha ka kyrwoh khubor.
Katkum ka jingpynpaw jong ka Federation, ki nongkhaii ka jylla kila mad ia kiba bun bah ki jingeh ha kine ki khyndiat por.
Kane ka kynhun kala kyrpad ia ka sorkar pdeng ban tuklar bad ban iarap ha kaban pynsuk ia ka khaii pateng bad ban weng ia ki jingeh kiba la mih hapoh ka jylla ha kine ki khyndiat por.
U Goyal ula pynthikna ia kane ka kynhun ba ia ki jingsngewkhia ki jongki yn sa shimkhia noh.
“U Myntri ka Sorkar Pdeng ula pynthikna ia ka kynhun ba yn sa khmih bniah ia kitei ki mat bad pynthikna ban pynsuk ia ka jingleh ia ki kam khaii pateng bad ki jingeh kiba mih ryngkat bad ka jingpynslem jong ki bor kiba dei khmih, kan ym lam pat sha ka jingduhnong ia ki nongkhaii jong ka jylla Meghalaya” la ong ha ka kyrwoh khubor.
“U Myntri ula bthah ia u Joint Secretary ka tnad Commerce & Industries ban sdang noh mardor ia ka jingialang ha ka kyrdan jong ki Secretary, ban pynbeit ia ki jingeh kiba dang sahteng kaba la mad da ki nongkhaii khnang ba yn lah ban ai jingbit noh katkum ki kyndon jong ka ain” la bynrap.
