Shillong, Jymmang 18 : U Myntri Rangbah ka Meghalaya bad Assam kila shimkhia bha ban iakren kumno ban pynbeit noh ia ka jingiakynad kaba mih ha Lapangap, ong u Symbud Myntri Rangbah Bah Sniawbhalang Dhar ha ka sngi Nyngkong, hadien ka jingialang bad ki shnong kabym shym la poi sha ka jingshim rai.
“Baroh arngut ki Myntri Rangbah kila iakren halor kane ka kam bad kila shimkhia bha” ong u Bah Sniawbha haba iakren bad ki nongthoh khubor, haba ban jur ba kane ka kam ka dei kaba la iaid ha ka jingiakren pynbeit ha ka kyrdan ba halor eh.
Kane ka jingkren kala mih hadien ba ki nongmihkhmat na baroh artylli ki Shnong kila iakynduh ha ka jingiadonlang ki Deputy Commissioner bad Superintendent of Police na Meghalaya bad Assam.
“Kala don ka jingialang hapdeng ki Shnong ha ka jingdonlang ki bor district na baroh arliang” ong u Bah Dhar. “Ka jingialang ka biang bha bad kala iaid suk hynrei ula pynthikna ba kam shym la don kano kano ka jingshimrai”.
“Ki dang don katto katne ki kam kiba dang sah” ula ong. “Khatduh, ka rai ba kumno ban iaid shakhmat, ngim pat lah ban rai bad ngin sa iapeit ha kine ki arsngi lane lai sngi ban wan”.
Ka kam rep kam riang ha kane ka jaka ba iakajia ka dang sahkut bad ym pat lah ban pyniaid shakhmat.
Haba kylli la ka rep ka riang kala sdang biang, u Bah Sniawbha ula ong “Kat haduh mynta ka sngi, kam pat sdang satia”.
U DyCM ula pynshai ba ka jingiakajia ha Lapangap kam dei satia shibynta jong ka jingiakren pynbeit khappud.
“Halor ka kam Lapangap, kam dei ka jingiakajia pud, ka dei eh halor ka jakpoh” ula ong.
Halor ka wat kaba ar jong ka jingiakren pynbeit pud, u Bah Sniawbha ula ong ba ka Meghalaya ka dang ap ia ka Assam ba kan thung biang ia ka Regional Committee.
