Shillong Nailur 30: Ki shipai Border Security Force (BSF) Meghalaya haka 29 tarik u Nailur kila ioh ban kurup 775 bilor ka dawai dih pynbuaid Phensedyl kaba shongdor kumba T.1.6 Lak na ka thain khappud kaba hap ha West Jantia Hills, Meghalaya ia kaba la thmu ban khaïï be-aiñ sha ri Bangladesh.
Katkum ka kyrwoh na ka BSF kila pynpaw ba katei ka dawai pynbuaid kadei kaba jur bha ka jingdawa ha ka ri Bangladesh ha kaba ki paidbah ki dih iaka ha ka jaka jong ka kyiad.
Naduh ba sdang une u snem, ki BSF Meghalaya kila ioh ban kurup haduh 5000 bilor ka Phensedyl na ki thaiñ khappud jongka ri India bad Bangladesh.
Ki BSF kila dep ruh ban ithuh ia ki katto katne ki jaka bad kila pynkhreh ia ki lad ki lynti ban pynjur iaka jingpahara bad khanglad ia ki nongkhaïï be-aiñ bad ban tem ia ki kam sniew ha ki thaiñ khappud.
