Jowai, Lber 17 : U MLA ka Shongpung Bah Comingone Ymbon, ha ka sngi Saitjain, ula plie paidbah ia ka jingkieng doidoi bala shna halor ka wah Umyurem ha Shangpung, West Jaintia Hills.
Kane ka jingkieng, la shna ha ka jnglut ba T.49,98,700 lyngba ka Ophis u Deputy Commission hapoh ka District Rural Developmen Agency (DRDA).
Kane ka jingkieng ka dei ka lynti ba kongsa na shiliang sha shiliang ka wah Umyurem kaba pyniasoh ia bun ki jaka rep kiba phiah da ka wah. Kane ka jingkieng kala wanrah ia ka jingkmen ia ki nongrep bad ki nongshongshnong kiba ju leit sha ki jaka rep.
Da ki snem, ka leit ka wah sha ki jaka rep ka long kaba jynjar bha, khamtam ha ka por lyiur ba hehum, kaba la ktah jur ia ki nongrep. Kane ka jingkieng la khmih lynti ba kan ai ia ka iaid ka ieng kaba shngain ia ki nongshongshnong kiba leit rep leit riang manla ka sngi.
U Bah Comingone ula pynpaw ba kane ka project jingtei ha ki shnong nongkyndong ki shim ia ka bynta kaba khraw bha ban kyntiew ia ka kamai kajih bad pynsuk ia ka leit ka wah ki nongshongshnong.
Nalor kane ka jingkieng doidoi, u Bah Coming ula pynbna ruh ia ki kam pynroi na ka bynta ka Shangpung ba kynthup ia ka jingsiang rong ia ki surok shnong, ka jingthied ia ki kali lum niut bad kiwei kiwei ki jingdonkam kiba kot T.15 klur.
