Shillong, Jymmang 17: U Myntri Sorkar ba MLA ka South Shillong Bah Sanbor Shullai ha ka sngi Saitjain u la pynkup burom ia ki thei ialehkai football jong ka shnong Lumparing, kiba la ioh bat ia ka nam kum ki Champion jong ka Women Football League Tournament 2025-26.
Ki thei ialehkai phutbol ka Lumparing kila ioh ban rah ia ka nam lahduh ka Women Football League hadien ka jingpynliem ia ki thei ialehkai ka shnong Laitkor, ha ka jingialehkai final kaba la pynlong da ka Shillong Sport Association, ha madan Polo.
U Bah Sanbor u la pynkup burom lang ruh ia ki nongkitkam jong ka Lumparing Sport Club nalor ki thei ialehkai, ha ka jingialang ba la pynlong ha Indoor Stadium, Lumparing, kaba la wan sakhi lang da ki nongkit kam shnong jong ka Lower bad Upper Lumparing ha ryngkat badki nongkitkam shnong ka shnong Laban.
U Bah Iaineh Nongkhlaw, President ka Lumparing Sport Club, u la ai khublei ia u Bah Sanbor Shullai uba la ju kyrshan khlem sangeh ia ka Sport Club bad khamtam eh halor ka jingkyrshan jong u ia ki thei ialehkai jong ka shnong hapdeng ka jingiakhun tad haduh ban da jop ia ka tournament.
U Bah Sanbor Shullai haba ai jingkren u la pynpaw ka jingkmen ba khraw ba ka shnong Lumparing kaba hap hapoh ka 19th South Shillong Constituency, kala ioh ia ka nam bad burom lyngba ki thei samla kiba ialehkai football.
