Shillong, Jymmang 16: U Myntri Rangbah ka jylla u Conrad K Sangma dang shen ula lum ia ka jingialang ban khmih ia ki sienjam ban pynduna bad ban tehlakam ia ka jingkynrei u droks hapoh jong ka Drug Reduction, Elimination, and Action Mission (DREAM).
Ia kane ka jingialang la pynlong ha State Guest House, Taraghar, Shillong, ia kaba la wan ban iashimbynta da ki ophisar ka tnad Social Welfare Department bad kiwei kiwei ki tnad.
Ha kane ka jingialang la iatai halor ki jingtei ha kylleng jong ka jylla, kaba kynthup ia ka jingpyntreikam ia ki Centre bad ia ki jingtyrwa kiba thymmai na kylleng ki district hapoh jong ka DREAM. La pyntip ruh ba kila don katto katne ki Rehabilitation Centre kiba la treikam, katba ia kiwei pat ki jingtyrwa kidei kiba dang don hapoh ka jingkhmih bniah.
Ki jingeh kiba mad ki kynthup ia ka jingpynslem ban aiti ia ki No Objection Certificate (NOC), ka jingbym ioh ia ki jaka bad ki jyrwit jyrwat kiba la mih ha kaban tei ia ki jingtei kiba thymmai.
Ki ophisar kila pyntip ba ki kam kila iaid shakhmat ban pynwandur pynwandar bad ban pyntreikam ia ki kyndon jingbthah na ka bynta ki Rehabilitation Centre ban pynthikna ba kin kloi bad ba ka jingpyntreikam kan long kaba iaid beit. La pynpaw ruh ba ki jingai jingshakri jong ki Rehabilitation hapoh jongka DREAM kidei kiba la ioh jingkyrshan lyngba ka jingtuklar jong ka sorkar bad ka jingiatreilang bad ki kynhun jong ka imlang sahlang bad ki kynhun niam.
Ka jingialang kala iakren ruh ha kaba iadei bad ki jingpyntreikam ia ki sienjam da ki pulit hapoh jongka DREAM, kaba kynthup ia ka jingkurup bad ka jingiohkem bad ruh ka jingpyniaid shakhmat ia ki sienjam ban iada katkum ki kyndon ain. Ki ophisar kila pynpaw halor ki sienjam kiba kila shim ban pynkhlain ia ki bynta jong ka jingtohkit ha kaba iadei bad ki jingjia jong ka jingkurup droks.
U Myntri Rangbah ula banjur ia ka jingkongsan ban pynkhlaun ia ka jingpyntreikam lyngba ka jingtohkit bad ka jingiatreilang bad kiwei pat ki shnad kiba hap hapoh ki kyndon ain. Ula banjur ruh ia ka jingdonkam ban pynwandur ia ki jingpyntip ia ki paitbah halor ki jingmih na ki sienjam treikam, ban kyntiew ia ka jingpynsngewthuh bad ban tehlakam.
Ka mat kaba hakhmat eh ha ka jingialang kadei ka jingiada bad ka jingpynsngewthuh paitbah hapoh jong ka DREAM lyngba ki buit jongka jingai jingtip, ka pule puthi bad ka jingpyniasoh.
Ha ka jingiakren la iatai sani kumno ban pyniar ia ki jingpynpoi lyngba ki shnong ki thaw, ki jaka pule bad ki nongialam shnong ryngkat bad ka jingpyndonkam ia ki QR ban ai ia ki jingtip kiba kongsan ha kaba iadei bad ki jingtip halor ki Rehabilitation bad ka jingai jingshakri, da ka jingthmu ban pynduna ia ka jingshah niew poh ha ka imlang sahlang bad ban pynbha ia ka jingioh ia ka lad.
U Myntri Rangbah ula kyntu ban don ia ka rukom treikam kaba biang kaban batai shai kdar ia ki mat, ka jingbuh por bad ka jingiai buddien kaba man la ka por ban khmih bniah ia ka jingiaid ki kam ki jam ha kylleng ka jingpyniar ia ki Rehabilitation, ban pynkhlain ia ki bor treikam bad ki sienjam ban pynsngewthuh paidbah hapoh jongka DREAM.
Ka jingialang kala kut da kaba poi sha ka jingbthah ba dei ban kyntiew ia ka jingiatreilang hapdeng ki tnad bapher bapher bad ban pynsted ia ka jingpyntreikam ia ki sienjam bad ia ki jingtyrwa kiba dang shu mih thymmai ha ka por kaba biang.
.){kind=link}