Pynrem ka UDP ia ka jingpyniap dusmon ia ki pastor ha Manipur | Dawa ia ka Sorkar Pdeng ban leh tyngeh ia kiba donkti

Shillong, Jymmang 14: Haba pynrem ia ka jingshah pyniap jong ki 3 ngut ki Pastor hapoh ka Jylla Manipur, ka United Democratic Party (UDP) ka la kynthoh ia kane ka jingjia kum ka kam riewkhlaw bad ka la dawa ba dei ban leh eiei mardor naka Sorkar Pdeng bad ka Sorkar Jylla ban pynngat katkum ki kyndon ain ia ki nongleh kam ia kane ka kam.

Ha ka kyrwoh u general secretary ka UDP, u Bah Titosstarwell Chyne, u la ong ba ka Party ka pynpaw ka jingsngewsih kaba jur bad ka pynrem jur ia ka jingshah pyniap jong ki 3 ngut ki Pastor kata u Rev. Vumthang Sitlhou, President ka TBAI, u Rev. Kaigoulun Lhouvum uba dei u Secretary Finance bad u Pastor Paogoulen Sitlhou.

“Kane ka jingleh kaikhlaw ka dei ka jinghiar thma ym tang ia ka jingim jong ki briew U Blei, hynrei kadei ruh ka jingiuh roit iaka jinglaitluid ha ka niam, bad ki jinglong laitluid jong ki paidbah ha ka ri India” la ong ka UDP.

“Ki Pastor kiba shakri ia ki shnong ki thaw da jingsngewrit, bad ka jingaiti lut khlem da pyrkhat ialade kim dei ban long satia ki nongshah lehbein bad shah thombor”
Ka UDP ka kynthoh ba kane ka jing thombor kadei kaba shyrkhei bad ka bym lah ban pdiang bad ka bym lah ban iada na kano kano ka nongrim.

“Ngi pynrem jur ia kane ka kam kaba shyrkhei. Ym lah ban don kano kano ka jingpynshisha ha ka sain pyrthei, ka jingphet jaidbynriew, ne ka niam na ka bynta ka jingpyniap ia ki nongialam niam ki bym don tiar ialeh” la ong ka kyrwoh.

Ka UDP ka la dawa naka Sorkar Pdeng bad Sorkar Jylla ban shim khia kyrkieh ban wanrah ka iingbishar hok iaki lanot.

“Ngi dawa ban leh eiei mardor na ka Sorkar Jylla Manipur bad ka Sorkar Pdeng ban kem ïa ki nongleh kam sniew bad ban pynthikna ïa ka jingbishar hok. Ka synshar ka aiñ ka dei ban jop halor ka jingleh be-aiñ,” la ong u Bah Titos.

Haba pynpaw ïa ka jingsngewlem, ka UDP ka la ong, “Ngi ieng ha ka jingïatylli bad kiba haïing hasem jong ki Pastor kiba la khlad noh, ka Balang ha Manipur, bad ki paidbah Khristan ha kylleng ka thaiñ Shatei Lam Mihngi”.

Ka la kyntu ruh ia ka National Human Rights Commission for Minorities ban tuklar. “Ngi kyntu ia ka National Human Rights Commission for Minorities ban shim daka Suo Moto halor kane ka jingjia bad ban pynthikna ia ka jingiada ia ki jaitbynriew rit paid, bad ki nongialam niam”.