Shillong, Jymmang 15 : Ka Iingkashari Meghalaya High Court kala bthah ia ka Khasi Hills Autonomous District Council (KHADC) ba kan aiti ia ki kot ki sla ba don jingiadei ha ka mukotduma bala mudui da u Sordar ka Shnat Raid Tynring ba tynjuh pyrshah ia ka hukum ba khang ia ki ban pyniaid ia ki kam jaka.
Ia kane ka mukotduma la shong bishar da u Justice HS Thangkhiew ha ka sngi Ba-ar.
U nongmudui mukotduma ula tynjuh pyrshah ia ka shithi ba 16-12-2025, kaba la khang ia u ban pyntreikam iala ki kam “haba iadei bad ka kam die, aiti, pyntreikam ia ka deed, ka jingai noh ia ka jaka ka Raid hapoh ka shnong Tynringn bad Shna Raid Tynring, Khyrim Syiemship”.
Haba mihkhmat ia u nongmudui, u Advocate PA Dohkrut ula pynpaw ba lait na ka hukum kaba la pyrshah, u nongmudui um shym la ïoh satia kano kano ka jingujor pyrshah ia u. U la pynpaw shuh shuh ba wat la ïa ka shithi “la buh dur kum ka show cause, ym shym la ai kano kano ka jingkynnoh kaba bniah ban ïarap ïa u ban jubab shuwa ïa ki nongshah mudui.”
U advocate Dohkrut u la pynksan ba “lada don kano kano ka jingujor ban ai, ïa kata dei ban rah nyngkong sha ka Hima Khyrim.” U la kyrpad ba “ha kane ka por, ïa ka jingtreikam jong ka hukum ba 16-12-2025 dei ban pynsangeh shuwa shipor.”
Haba mihkhmat ia baroh ki nongshah mudui, u Advocate PS Nongbri u la pynpaw ba “u nongmudui ula ioh ia ka copy jong ka jingujor, watla kam don ha kti ïa kano kano ka jingpdiang ha ka Iing Kashari mynta ka sngi.” U la pynpaw shuh shuh ba “kat kum ki kyndon jong ka Sanad, u nongmudui writ um don satia ka bor ban pyniaid ïa ki kam khyndew kiba ïadei bad ka Ri Raid bad Ri Kynti khlem ka jingtip jong ka Hima.”
U advocate Nongbri u la ong ba namar u nongmudui u la leh ïa ka kam ban die duh ia ka khyndew hapoh ka Shnat Raid Tynring, la pynmih ïa katei ka hukum kaba la pyrshah.
Hadien ba sngap ia baroh arliang, u Justice Thangkhiew u la kdew, “Ka jingpeit ïa ka shithi ba la pyrshah ba 16-12-2025 ka pyni ba ym don kano kano ka jingkynnoh kaba bniah lait noh ka jingujor ba 20-11-2025 kaba la kdew, kaba la mudui da uwei u briew ba kyrteng u Bah Oshalson Nongbri.”
Ka Iing Kashari ka la ong, “Ka paw ba kane ka kam ka dei ban ïoh ïa ka jingbishar kaba kham bniah bad ruh ka jingwanrah ïa ki kot ki sla/file kiba ïadei bad kane ka jingïaid mukotduma.”
Ka Iingkashari kala buh ban bishar biang ia kane ka mukotduma ha ka 20 tarik Jymmang.
 ba kan aiti ia ki kot ki sla ba don jingiadei ha ka mukotduma bala mudui da u Sordar ka Shnat Raid Tynring ba tynjuh pyrshah ia ka hukum ba khang ia ki ban pyniaid ia ki kam jaka.){kind=link}