Meghalaya State League | Jam ka Langsning sha ka Quarterfinal daka hattrick u Samuel Phawa

Shillong, Jymmang 12 : Ka kynhun Langsning FC ka la  jam shakhmat ha ka lympung 5th Meghalaya State League ka Meghalaya Football Association (MFA) hadien ka jingpynliem da 5-0 kol pyrshah ia ka Lumphyrnai Sohphoh FC, ha ka jingiakhun balong ha ka janmiet sngi Ba-ar ha SSA Stadium, Polo.

U namtam ha kane ka janmiet iakhun u dei u Samuel Phawa uba la ioh thep hattrick (25′, 45′, 45+1) bad la bynrap lang sa da ki kol na u Nelson Rymbai (4′) bad Denelson Pyngrope

Wat lada ka jingiathep ia ki kol ka I long kumba lam noh shilliang bha ka jingiakhun, hynrei ha madan iakhun pat ka Lumphyrnai Sohphoh ka la sei ia ka buit ka bor ialehkai ka jong ka bad wat ba la don ki khep ba kan pyrshang ba kan tynjuh borbah bha ia ka kynhun ialehkai ka Langsning FC, kaba don ki khep u ka pynlong ia u rang ap kol u Rajat Paul Lyngdoh ba un hap ban long uba peitngor bad ban phikir bha ia la ka jong ka kol.

Ha ka jingshisha ia kane ka jingiakhun la dei ban pynlong ia ka hynnin ka sngi ha Mairang, hynrei naka daw ka jingbym biang ka suin bneng, la hap ban pynsangeh noh ia ka bad ban kynriah pat ia ka shane sha nongbah Shillong.

Da kane ka jingjop ka Langsning, ka jingdon ki kynhun ban khreh iakhun pat mynta ia ka quaterfinal ka la long kaba la dap bad biang pura da baroh 8 tylli ki team.

Ha ka jingpyniakap, ka Nongkseh SSCC, Mawlai, SC, Shillong Lajong FC bad Rangdajied United FC lah ban ong ba ki don ha ka thup ka group of death  jong ka Group A, katba ka Nangkiew Irat SC, Rymbai Shkenshynriah SC, Langsning FC bad Maram FC ki don ha ka Group B.

Kat kum ba la pynbeit man la ki kynhun sa shisien kin khreh ba kin iakhun biang hapdeng para maki sa mar ar kylla, ha kaba ki artylli ki kynhun ba ioh khur bun point na kine ki group kin jam pat ialade sha ka kyrdan iakhun ka semifinal, ha kaba baroh kine ki jingiakhun kin long hangne ha nongbah Shillong.

Ki artylli ki jingiakhun sdang la buh ba kin long lashai ka sngi bad barh ar kidei jong ka Group A ban long ha SSA Stadium, ha kaba ka Nongkseh SSCC kan mih madan ban iakhun pyrshah ia ka Mawlai kaban long ha ka por 2 baje nohphai sngi bad ha ka por 6 baje janmiet ka jingiakhun kan long hapdeng ka Shillong Lajong FC pyrshah ia ka Rangdajied United FC.