Aipor 48 kynta ka NPP ia u CEM ka NCHAC ba kynthoh “B-team’ | Byrngem ai mukotduma pynbudnam

Shillong, Jymmang 12 : Ka National People’s Party (NPP) hynne ka sngi Baar, kala dawa ia u Chief Executive Member ka North Cachar Hills Autonomous Council (NCHAC) Debolal Garlosa ba udei ban pynkylla noh ia ka rukom kynthoh ka jongu ia ka NPP ba ka dei ka “Team B” bad udei ruh ban pan map hapoh jong ka 48 kynta lem kumta yn hap iaid da ki lynti jong ka aiñ.

U National Working President ka NPP u James K Sangma ula pynrem jur ia ka jingkynthoh u Garlosa ha ka jingrakhe ka NCHAC ia ka Platinum Jubilee ha Haflong ha ka 11 tarik u Jymmang, bad ong ba ka jingkynnoh ka dei kaba bakla, ka jingthmu ban pynbudnam bad kaba la ialam da ka buit leh politik”.

“Ka jingpyrshang u Debolal Garlosa ban pynman ia ka seng NPP kum ka ‘Team B’ kam dei satia tang kaba bakla pura, hynrei ka pyni ruh ia ka jinglong bym shngain bad ka jingduna ha ka rukom pyrkhat” la ong u Sangma.

“Haba u nongialam seng sain pyrthei, na ka rynsan jong ka ophis treikam paitbah, u jied ban kyrsum ha ka jingwanrah ia ka rukom pyrkhat iasuhbuit, ki khana thaw bad ka nongrim kaba tad dor ha ka jaka ban leh ia ki kam kiba la rangbah ka jingmut ka jingpyrkhat ha ka kam synshar paitbah, ka kren ia kaei kaei kaba u don ia ka jingthmu kaba nalade hi shaphang kata ka seng kaba u thmu ban kynthoh ne pynibor” ula bynrap.

“Ka National People’s Party kam dei, kam shim lah long bad kan ym long hi ruh bad da leilei satia kan ym dei ka ‘Team B’ jongno jongno ruh” ong u Sangma.

Ula ong, ba ka NPP ka dei ka National Party kaba don ia la ka nongrim treikam bad ka thong.

“Ka jingai jingmut ba ka NPP ka donkam ia ka jingpynshisha, jingmynjur ne ka jingbthah na ka bynta ka rukom treikam na kawei pat ka seng sain pyrthei hashwa ban iakhun ia ka elekshon kam dei satia tang kaba shu thok, kadei ka jingktah mationg ia ka jingstad jong ki nongthep vote” ula ong.

U Sangma ula pynshai ba ka jingrai ban pynieng ia u Daniel Langthasa kum u kyrtong ka NPP na Haflong (ST) Assam Assembly election 2026 kadei kaba la shim rai laitluid.

“Kam shim la don kano kano ka jingiakren, jingiasyllok, kano kano ka jingiasngewthuh jingmut bad kano kano ka jingiapynbeit seng sain pyrthei la kadei bad ka BJP ne bad kiwei pat ki seng sain pyrthei ha kaba iadei bad katei ka jingshim ia ka rai” ula ong.

Ula ong ba ka jingkynnoh u Garlosa ba kala don ka jingiakren kaba kynthup ia u National President ka NPP uba dei ruh u Myntri Rangbah ka Meghalaya u Conrad K. Sangma kadei tang ka jingthaw khana thok.

“Ban shu kynnoh khlem ka nongrim ne khlem ki sabut kadei ka jingbym don satia ia ka jingkitkhlieh, ka jingpynthobria bad ka bym iahap ia uno uno ruh uba bat ia ka kyrdan treikam ha ka ophis kaba la ithuh da ka rit synshar” ong u James Sangma.

“Ka paw, ba ha ka jaka ban kren ia ki jingeh bad ia ki jingsngewkhia jong ki paitbah ha kaba iadei bad ka kam synshar khaddar, ka roi ka par bad ka jingangnud jong ki paitbah ka Dima Hasao, u Garlosa ula jied pynban da ka lynti iaid kaba klumar jingmut, ka jingbym don ia ki jingtip kiba thikna bad ban pynthohbria ia kiwei” ula bynrap.

“Ka politik jong ka jingbym shngain ka ju pynmih ia kum katei ka rukom hi, haba uwei um lah ban pynrem ia u nongialeh pyrshah ha ka kam sain pyrthei, kumta u pyrshang ban pynduh jingithuh lyngba ki khana kiba shu thaw ne mutdur”.

U Sangma ula maham da kaba ong, “Ka National People’s Party ka dawa ba u Debolal Garlosa udei ban kylla noh mardor ia ka rukom kynthoh ka jongu kaba dei kaba bakla bad ban phah ia ka jingpan map na ki paitbah lyngba ki lad pathai khubor hapoh jong ka 48 kynta.”

“Lada u pulom ban leh ia katei, ka seng kam banse ban wad ia baroh ki lad ki lynti jong ka ain, kynthup ban dawa ia ka bai mynrain khmat pyrshah ia u ha ka kyrdan shimet ka jongu” ula byrngem.

“Ki paitbah ka Dima Hasao kidei kiba la shemphang ha ka kam sain pyrthei, kiba la ih bha bad kiba lah ban shim ia ka rai. Kin iohi ba lyngba kitei ki jingpyrshang kiba kutlad kum ka jingai ia ki jingtip ki bym don ia ka jingshisha” la ong u Sangma bad ka bynrap ba ka NPP ka iengskhem kum ka seng sian pyrthei kaba treikam laitluid bad kaba bteng ban shim ia ka jingkitkhlieh ia ka kam synshar paitbah, ki hok jong ki riewlum, ban iada ia ka riti synshar ka ri, ka roi ka par bad ban pynurlong ia ka jingangnud ki paid riewlum”.