Pynkhreh ka Meghalaya ban leh ia ka SIR ka Electoral Roll | Ap ia ka jingbuh por ka ECI, ong u CEO

Shillong, Jymmang 12: Ka Jylla Meghalaya kala pynkhreh ban sdang ia ka Special Intensive Revision (SIR) jonga thup kyrteng thep Vote ne Electoral Roll bad kan sa sdang ia ki kam ki jam hadien ba ka Election Commission of India kala pynmih ia ka jingpynbna, ong u Chief Electoral Officer u Dr BDR Tiwari hynne ka sngi Baar.

“Haba la pynmih ia kano kano ka jingpynbna kaba iadei bad ka Meghalaya da ka Election Commission of India, ngi ngin sa iaid shakhmat bad kata hi” la ong u Tiwari haba iakren bad ki nongthoh khubor.

“Baroh kan shong lut ha ka ECI”ula ong

Ka SIR kadei kaba kongsan, ka jingpynthikna kaba pura ia ki kyrteng jong ki nongthep vote bad kadei kaba la pyndep ruh ha ka jylla Bihar bad ha ki 12 tylli kiwei pat ki jylla, ula ong.

Haba batai shaphang ka jingpyniaid ia katei ka kam, u Tiwari ula ong, ba kan don ka snem ot kyrteng ia ki nongshong shnong hapoh jong ka Indian Citizenship Act kaban sa pyntreikam. “Kaba nyngkong kadei ka 1 tarik u Naitung 1987. Uno uno uba la kha hapoh ka ri India shwa katei, kila dei lypa ki nongshong shnong ka ri India lyngba ka jingkha ia ki” ula ong.

Namar ba ia ka SIR hapoh Meghalaya kadei kaba la leh khatduh eh ha u snem 2005, ka Electoral Roll ha u 2004 yn sa pyndonkam ia ka kum ka Reference Point. “Ka kyrteng jongno jongno ruh kaba mih ha katei ka por, kan long kum ka jingwan hiar pateng (Lineage) ka jongki” la pynshai u Tiwari.

Ula ong, baroh ar ki nongthep vote kiba la don lypa bad kiba dang shu aplai thymmai kiba la palat ia ka 18 snem ka rta ki hap ban pynshisha ia ka jingwan hiar pateng ka joingki.

“Ki kmie ki kpa ne ki parad ne meirad kidei ban dei ki nongthep vote. Ki hap ban pyni ia ki rekod ia ki kmie ki kpa ne ki parad ne meirad ryngkat bad ki jingpynshisha ia ka jinglong trai ka jongki” ula ong. Ka ECI kala dep ban pynmih ia ka jingpynbna ia ka thup jong ki kot ki sla kiba lah ban pdiang ban ithuh ia ka Identity ne jinglong shisha.

“Ka Meghalaya ruh kala long kaba la pynkhreh ban leh ia ka SIR katkum ka jingpynbna da ka ECI,” ong u Tiwari.

Da kaba ong, ba kadei ka rukom leh kaba man la ka por, “Ka SIR kadei kaba kongsan bha. Kadei kaba la leh ha kylleng ki jylla. Kane kam dei ka sien kaba nyngkong, kadei kaba la leh la bunsien hapoh ka ri”.

Halor ka jingpynkhreh, u Tiwari ula ong, ba baroh ki bor pyniaid elekshon kidei kiba la pynkhreh lypa.

“Ki BLO, Supervisor, ERO, ARO bad baroh kiba khmih ia ka elekshon kidei kiba la don lypa lut. Kaei kaei kaba donkam ia ki nongtrei na ka tnad elekshon, ngi lah long kiba la pynkhreh” ula ong.

Hynrei ula pynpaw pat ba kala don ka jingsuki ha kaban thung ia ki Booth Level Agent (BLA) da ki seng saiñ pyrthei hapoh ka jylla.

“Ngi iai bteng ban kyrpad ia ki seng sain pyrthei ban thung ia ki BLA hynrei ka jingiaid shakhmat kam shim la long satia kaba biang” ula ong. “Ka pyni ba ki don ia ka jingshaniah kaba skhem ha ki bor pyniaid ia ka elekshon. Kham hashwa ruh kim ju don kano kano ka jingujor pyrshah ia ki bor pyniaid ia ka elekshon”.

Ka jingkhmih bniah ia ki jingtip halor ka SIR 2005 ka pyni ia ka jinglah ban kynthup ia kiba bun ki jaka.

“Ngi lah leh ia ka Table-Top Exercise bad shem kumba 80% na ki kyrteng kidei kiba lah dep ban pynshisha hapoh ka jylla. Kane ka long kaba bha, ha kaba iadei bad ka jylla jong ngi” la ong u Tiwari.

Ha kaba iadei bad ka jingkynnoh ia ka jingshah liang, ula ong, “Ngam lah ban kren eiei halor katei, hynrei kam shim la don kano kano ka jingujor ia kaba lah ban pynshisha. Baroh kiei kiei ki jia ha ka lynti kaba khuid ba suba, ha ka rukom kaba laitluid ha baroh kawei ka ri. Ngi don ia ka jingngeit kaba skhem ba kan long katkum ka ain”.

U Tiwari ula bynrap ba ka jingthmu ban pynlong ia ka SIR kan bud hadien ka jingiaid jong ka jinglum ia ka khanasamari.

“Ka jinglum ia ka Census ne Khanasamari kadei kaba la iaid shakhmat katkum ka jingpynbna. Ka jingthmu ban pynlong ia ka SIR yn sa pynbna ryntih da ka ECI.”