Shillong, Jymmang 12 : U Chief Electoral Officer ka Meghalaya Dr BDR Tiwari ha ka sngi Ba-ar, ula ong ba ka elekshon shiteng samoi jong ka Shillong Lok Sabha seat ka dei ban hap pynlong hapoh hynriew bnai hadien ka jingiap jong u sitting MP bad ki bor pyniaid elekshon ka Jylla, kila long kiba la pynkhreh ban pyniaid ia kane ka elekshon.
“Ha ka jingshisha, kat kum ka hukum, ka dei ban long hapoh ka hynriew bnai hadien ka jingiap jong u MP ka Shillong Parliamentary constituency” ong u Tiwari haba iakren bad ki nongthoh khubor haba kylli halor ka por ban pynlong ia ka elekshon shiteng samoi.
“Ngi long kiba la pynkhreh pura ban pynlong ia kane ka elekshon shiteng samoi” ula bynrap.
U MP ka Shillong Dr Ricky AJ Syngkon jong ka VPP ula khlad noh ha ka 19 tarik Rymphang 2026.
Haduh mynta, dang artylli ki party kiba la pynbna ia ki kyrtong ki ban iakhun ia ka elekshon. Ka NPP kaba don ha ka liang synshar kan pynieng ia u President ka Khasi Author Society (KAS) Dr DRL Nongleit katba ka VPP kaba don ha ka liang pyrshah kan pynlong ia u Prof Batskhem Myrboh kum u kyrtong.
Halor ka elekshon Rajya Sabha, u CEO u ong ba ka elekshon kan sa long hashuwa ba lait thylli ka shuki. “Kat kum ka por bala ai, shen shuwa ban lait thylli ka shuki, nga kyrmen ban longka elekshon ha kano kano ka por jong u bnai Jylliew” ong u Tiwari.
