Shillong, Jymmang 10: U Nongialam ba thymmai ka Khasi Students’ Union (KSU) u samla Raymond Kharjana ula ong, ba ka seng kala ioh bor na ka jingiengskhem ha ki nongrim bad ka jingaiti lut jong ki dkhot bad ka kular ba ka KSU kan ym shongthait ha kaban shim ia ki mat kiba ktah ia ki jaidbynriew Khasi.
U Raymond Kharjana ula shah jied khlem kano kano ka jingiakhun ha ka Elekshon ba 16 jong ka KSU kaba la pynlong ha Dinam Hall, Jaiaw ha ka sngi Saitjain.
“Ki nongialam ki leit ki wan, hynrei ka nongrim jong ka seng ka long kaba khlain bad kaba iaineh na kawei ka samoi treikam sha kawei pat” ong u Kharjana haba kren sha ki dkhot jong ka KSU.
Ula pynpaw ia ka jingnang kiew bad jingkhlain ka seng mynta lah jan 50 snem, “Ka seng kala don 48 snem ha ka jingiaid lynti bad 16 tylli ki elekshon, hynrei katba ki sngi ki nang iaid, phi iohi ba ka seng ka nang khlain bad kala nang iohbor shuh shuh man la ki snem” ula ong.
“Kane ka jingkhlain bor jong ka seng wat hapdeng ka jingmad ia kiba bun ki jingtynjuh, kadei namar ka jingiengskhem ha ka nongrim ym tang jong ki nongialam hynrei da man la ki dkhot jong ka seng” ula bynrap.
“Nga ngeit skhem ba ka seng kan iai roi bad khlain shuh shuh nangne shakhmat namar ba ki don ki samla kiba shlur kiba nud ban len lade na ka bynta ka dawbah jong ka jaidbynriew bad ia ka jylla hi baroh kawei”.
U Raymond Kharjana ula ong, ba ki mat jongka Central Executive Committee kan dei kaba ia shim rai lang da baroh.
“Ngi ngim don eiei ban pynbna eiei noh mynta hi ia ki mat jong ka CEC bathymmai, hynrei ka KSU kam dei ka seng kaba rai shimet. Hynrei ka iaid shakhmat da ka jingiasyllok kum kawei ka kynhun” ula ong.
“Ha ki sngi ban wan, kan sa don shuh shuh ia ka jingpynrung ia ki dkhot sha ka CEC bad ha ka sngi ba pyntian smai, phin sa iohsngew kaei kaba ka seng ka don ia ka jingthmu nangne ban iaid shakhmat” ula bynrap.
Ha kaba iadei bad ki mat kiba dang sahteng, u Raymond Kharjana ula ong, ba ka seng kan bteng ban iai shimkhia ia ki.
“Ngi ngim don ia ka jingartatien ba ia ki mat kiba rim kiba ktah ia ka jaidbynriew kin iai don bad ngi ngin bteng ban pynbha shuh shuh kumno ban pynurlong ia ka jingthmu ka jong ngi” ula ong. Ula kubur ba ka jingseisoh kan ym wan ha man la ki bynta hynrei ula kular pat ban iai bteng ban shimkhia tyngeh.
“Ngi ngim lah ban kular ba ngi ngin jop ha man la ki mat kiba ngi iakhun pyrshah hynrei kaei kaba nga kular hangne, ka long ba ngi ngin nym shongthait” ong u Kharjana.
“Wat lada ngi kyllon, ngi ieng joit biang. Wat lada ngi shah rem, ngi ieng joit biang. Ngi ngin bteng ban kren bad bteng ban pynsawa ia ka jingeh bad jingjynjar kaba mad da ka jaidbynriew haduh ban da iohsngew”.
U Raymond Kharjana ula maham ruh ia ki nongkynthoh, “Nga kwah ban ong tang kawei ia kito kiba kwah ban tynjuh bor ia ka seng, wat nym ktah da kaba suk, lem kumta phin mynsaw, namar ba ka seng ka don ia ki dkhot kiban ym kynran dien ban mih ha ki surok na ka bynta ka jaidbynriew” ula ong.
“Kan ym lei lei, lada ngi hap ban iaid shakhmat, ki dkhot jong ka seng kin ieng hakhmat ban iakhun na ka bynta ka dawbah jong ka jaidbynriew” ula bynrap.
U samla Rueben Anderson Najiar bad u samla Pynkmenlang Sanmiet kila shah jied khlem kano kano ka jingiakhun na ka bynta ka kyrdan General Secretary bad Vice President.
Ki dkhot kiba la shah jied kum ki nongkitkam kiba thymmai ka KSU ki kynthup ia u Pynshailang Rani kum u Assistant General Secretary, u Cleenstar Shabong kum u Organizing Secretary, u Alerick Kharjana kum u Education Secretary, u Pynshaikupar M Dkhar kum u Information and Publication Secretary, u Gary R Mawlieh kum u Office Secretary, u Eric Anthony Nongkynrih kum u Sport and Culture Secretary bad u Shinning Kharbihkhiew kum u Environment Secretary.
 u samla Raymond Kharjana ula ong, ba ka seng kala ioh bor na ka jingiengskhem ha ki nongrim bad ka jingaiti lut jong ki dkhot bad ka kular ba ka KSU kan ym shongthait ha kaban shim ia ki mat kiba ktah ia ki jaidbynriew Khasi.){kind=link}