“Uba pdiang da baroh ki briew ha ka Imlang Sahlang’ : Ong u DyCM ba u Dr Nonglait un ioh jingkyrshan bha ha ka Shillong LS Bye-election

Shillong, Jymmang 11 : U Symbud Myntri Rangbah bad National Vice President ka NPP Bah Sniawbhalang Dhar ula ong ba ki khubor ba ioh da ka party ki pyni ba u President ka Khasi Author Society (KAS) Dr DRL Nonglait, u briew ba ka NPP ka jied ban pynieng ha ka elekshon shiteng samoi ka Lok Sabha, u dei u briew ba pdiang lut da baroh”.

“Hadien ba la pynbna ba u Dr Nonglait un dei u kyrtong ka party, ka khubor ba ngi la ioh, ka pyni ba u dei u briew bala iapdiang lut na baroh ki briew ha ka imlang sahlang” ong u bah Sniawbha.

Haba ai khublei ia ki bahaiing hasem u Dr Nonglait, ula bynrap “Na ka liang jong nga, nyngkong eh nga pynpaw ia ka jing sngewnguh bad ai khublei kyrpang ia ki bahaiing hasem u Dr Nonglait. Ula pdiang ia ka jingtyrwa ka party”.

U Bah Sniawbha u la pyniadei ia ka jingpdiang ban long kyrtong bad ka rukom tyrwa jong ka NPP.

“Haba ngi kwah pynbna ia u kyrteng, ngi kum ki nongialam ngim shym la leh hi marwei” ula ong.

“Ta ka daw ngi khot ia ki nongialam jong baroh 36 tylli ki block kum ka dak ban iasakhi lang, kum ka dak ka jingiatreilang bad iashim rai lang. Nga iohi ia ka dak ka jingkmen ba u Dr Nonglait ula mynjur” ula ong.

Haba shim ia ka daw ka jingrung u Dr Nongleit sha ka jylli sain pyrthei kum ka dak kaba bha, u Bah Sniawbha ula ong “Kumba u ong, Nga wan sha ka kam sain pyrthei ban tei ia ka Jaidbynriew, ban weng ia ka jingiashun hapdeng ki briew jong ngi hi, namar ngi sngewthuh ba lada ngin ia ieid para briew, kumno ngin ieid iala ka Jaidbynriew. Kane ka pyni ba u dei u briew uba la ih bha”.

U ong ba ka party ka shim ia ka jinglong kyrtong u Dr Nonglait kum kaba kongsan bha na ka bynta ka Jylla. “Ngi hap ban trei shitom met bad mynsiem khnang ba ngin lah ban wanrah ia ka jingjop ia u kyrtong jong ngi. Ka jingjop jong u kan dei ka jingjop jong ka Jylla baroh kawei” ong u Bah Sniawbha.

Haba kyrpad ia ki nongthep vote, ula ong “Nga kyrpad ia baroh ki nongshongshnong ka Jylla, khamtam ki samla, ban ai ha u ia ka lad ba un long u shakri ba bha tam na ka bynta ka Jylla bad ban mihkhmat ia ngi ha Parliament”.

Haba pynpaw ba ka dang kloi palat ban shu kren pynkut, u Bah Sniawbha ula iai ban ba ki khubor bala ioh hi ki pyni ba ka don ka jingkyrshan na baroh ki liang ia u Dr Nonglait.