Imphal, Jymmang 7: Ki suba kaikhlaw la kynnoh ba ki la hiar thma ïa ki shnong ha Manipur ha Kamjong district hajan khappud Myanmar ha ka step jong ka sngi Palei, ha kaba ki la pynmynsaw ïa arngut ki riew paidbah bad thang ïa ki katto katne ki ïing.
Katkum ki khubor kiba la ioh lum la ong ba kitei ki jingshah thombor ki la jia ha ka por 2 baje mynstep ha ka iew Namlee bad ka shnong Choro kaba don ha khappud jong ka Kamjong District.
Ki tyllong khubor ki iathuh ba ym duna ia ka 18 tylli ki iing ki la shah thang, katba arngut ki riew paidbah ki la mynsaw na ki kuli ha katei ka jingshah thombor.
Ka Kamjong, kaba ïasam ïa u pud u sam bad ka Myanmar, ka la sakhi ïa ka jingkha roi jong ki jingeh ha ka liang ka lad jingïada ha kine ki bnai ba la dep, kynthup ïa ki kam kai khlaw ba ïaid lait sha kawei pat ka ri ba marjan.
Ka Working Committee jong ka Tangkhul Naga Long (TNL) ka la kynnoh ba ïa kitei ki jingthombor la leh da ki kai khlaw Kuki National Army-Burma, kiba la kynnoh ba la kyrshan da ka Myanmar’s People’s Defence Force (PDF).
“Ki shnong Tangkhul Naga ki la shah khynra bad shah rong noh ha ka por kumba 3.30 baje mynstep.Ki jaka sah jong ki riew paidbah ki la shah hiar thma pyrshah da kaba pyndonkam da ki drone, ki tiar siat rocket bad ki suloi lathode (breach-loading 40 mm), ha kaba la pynpra ia ki katto katne ki iing, katba ki don kiba la shah pynpra ha ki kai khlaw Kuki bad la lute ruh ia ki nongshong shnong. Ka TNL ka la kynnoh ha ka kyrwoh.
La iathuh ba ki tnad pahara ki dang buddien bha ia katei ka jingjia, wat la ka dang ap ia ka khubor halor ka jingshah pynjulor bad ka jingpynthikna ha kaba iadei bad kito kiba donkti.
U MLA ka thain u Leishiyo Keishing uba mihkhmat ia ka Phungyar constituency u la pynrem jur ia kitei ki kam thombor bad u la kam ba kitei ki nongthombor ki la rahbor ym duna ia ka arngut ki briew ba kynthup ia uwei u rangbah shwa ban kynran dien sha shiliang u pud u sam ka Myanmar.
Ki Naga organisation ki la kynthoh ruh ia ki shipai Assam Rifles, da kaba kynnoh ba katei ka kynhun shipai kam shym la lah ban pahara tikna ban khang lad bha ha khappud India bad Myanmar bad ban iada ia ki nongshong shnong na ka jingshah thombor sha shiliang pud.
