‘Iakhun haban da iap’ hynrei pep sha ka jingialang : Sangah u CM ia ka VPP halor ka Reservation Policy

Shillong, Jymmang 06 : U Myntri Rangbah ka Jylla Conrad K Sangma ha ka sngi Palei, ula kynthoh tyngeh ia ka Voice of the People Party (VPP) namar ka jingpep ban iashimbynta ha ka All Party Meeting bala pynlong ban iakren ia ka kaiphod ka Expert Committee halor ka State Reservation Policy, haba ong ba kane ka party ka dei ban “pyni da ki kam” lada sngewkhia ia kane ka mat.

“Hynnin ka sngi, nga la sngewsih shibun eh” ong u Conrad haba kren ha ka jingialang ka NPP ban pynbna ia u President ka Khasi Author Society Dr DRL Nonglait kum u kyrtong ka party na ka bynta ka elekshon Shillong Lok Sabha.

“Kumba phi iatip ba ka don ka Expert Committee kaba la aiti ia ka kaiphod halor ka State Reservation Policy bad haba pynshong nongrim ia ki jingdawa jong ki Liang Pyrshah hapoh ka Iingdorbar Thaw Ain ba dei ban khot ia ka All Party Meetong ban nang iakren shuh shuh halor ka kaiphod bad iasyllok ruh ia kiei ki kam ba dang hap ban leh, nga la khot ia ka jingialang hynnin ka sngi ia baroh ki seng sain pyrthei”.

Ula bynrap “Hynrei sngewsih katba kiwei ki seng sain pyrthei kila wan iashimbynta, kawei ka seng sain pyrthei kaba haba nyngkong kala wanrah ia kane ka mat bad pyrshang ban pyni sha ka thain bad ki paidbah ba ki don ia ka jingsngewkhia kaba khraw halor kane kam bad ba kin iakhun ia kane ka kam haduh ka jingiap….hynnin ka sngi nga ioh pdiang ia ka shithi na ki ba ong ba ki don ia kiwei pat ki kam ba kham kongsan namar kata kim lah ban wan na ka bynta ka Reservation Policy”.

Haba ban jur ba ki kam ki kham kongsan ia ka jingheh tyngam, u Myntri Rangbah ula ong “Paralok, ngi ong ha ka English ba ngi hap “walk the talk’ bad kumba nga ong naduh kaba sdang ba kam dei tang ki kyntiew jong ngi hynrei ki dei kikam jong ngi kiba kongsan..Lada phi iaid iala ki briew bad lada phi ieid iala ka khyndew ka shyiap pyni ia ka da ki kam, pyni da ka lynti synshar paidbah bad pyni da ka lynti kat kum ka riti synshar”.

U Conrad ula ai nuksa ia bun ki kam kiba la leh eiei da ka Sorkar jong u. “Ha kine ki phra snem bala leit la ka dei ka kam iakajia khappud, lane la ka dei ka jingdon ST Certificate ha GHADC, la ka dei ka jingdonkam ban don iala ka jong ka jingrwai Anthem ka Jylla, ban don la ka jong ka State Emblem, la ka dei ka kam ban ithuh ia ka Ktien Khasi bad Garo kum ka Official Language—bun ki kam ba kum kine lah shimkam da ka Sorkar ba ialam da ka NPP, kaba ki Sorkar barim kin nud satia ban taner ki kti” ula ong.

Haba kylli halor ki jingkren ba hashuwa jong u halor ka “sain pyrthei ha surok”, u Conrad haba kren bad ki nongthoh khubor ula ong “Ngi dei kiba don ia ka Iingdorbar bad ka jingthaw ain ka dei ka kyrdan ba hakhlieh duh ha ka synshar paidbah bad dei hangne ba ngi la rah ia ki mat kiba long kongsan ia u paidbah bad ia ka Jylla kum ki nongmihkhmat ba jied u paidbah…kane ka dei kumno ba ngi leh ha ka synshar paidbah…kumta, kaei kaba kongsan ka long ban im kat kum ka jingmut jong ka riti synshar bad ki kyndon jong ka synshar paidbah”.

U Conrad ula ban jur balei ba ka jingialang ka long kongsan bha.

“Haba pynshong nongrim na ki jingiatai bad jingiakren ha ka por ba nga wanrah ia ka kaiphod jong ka Expert Committee ha Iingdorbar Thaw Ain, kane ka seng sain pyrthei na ka Liang Pyrshah (VPP) kala dawa ba dei ban khot ia ka All Party Meeting ban iakren ia kane ka kam kham bniah, ia kaba nga la leh. Nga la ai ka jingkular hapoh ka Iingdorbar bad nga la pynurlong ia kane ka jingkular bad khot ia baroh ki seng sain pyrthei”.

“Hynrei kumba nga ong, katto katne ki seng sain pyrthei kila pyntip ia nga ba kim lah ban wan namar ki don ia kiwei pat ki kam ba kongsan kiba donkam ban leh eiei” ula ong.

Ula bynrap “Ka long kaba sngewsih ba katto katne ki seng sain pyrthei watla ki dawa hi ma ki, hynrei haba kut kila pep ban wan iashimbynta hi”.