Shillong, Jymmang 06: Ki seng sain pyrthei kin sa khmih bniah shwa ia ka kaiphod jong ka Expert Committee halor ka State Reservation Policy hashwa ba kin shim ia kano kano ka rai, ki nongialam kila pynpaw ia kane hadien ba kila wan ban iashimbynta ha ka All Party Meeting kaba la lum da u Myntri Rangbah ka jylla u Conrad K Sangma.
U Secretary ka MPCC Bah Manuel Badwar ula ong ba ia katei ka jingialang la pynlong ban batai ia ki seng sain pyrthei halor ka jinglap jong katei ka committee.
“Ia kane ka jingialang la lum da u Myntri Rangbah, uba la kwah ban ai jingtip ia ngi baroh halor ka kaiphod jong ka Expert Committee kaba la thaw ban khmih halor ka Reservation Policy bad ki jinglap ki jongka bad ruh halor ki jingai jingmut kiba kala ai” ula ong.
U Bah Badwar ula ong, “Kane ka jingialang kala long kaba shai kdar bha, ia kaba u Myntri Rangbah dalade hi um shim la shim sting eiei bad ngi burom ia katei”.
Ula bynrap, “Ngi ngeit ba ka jingbhah kyrpang kala treikam bha ha kine ki 50 snem kiba la leit, kam don kano kano ka jingdonkam ban pynkhih ia ka skum ngap bad nga tharai ba ka mat ka long kaba shai kdar bad kum ki nongshong shnong kiba don ia ka jingkitkhlieh ia ka jylla, ngi hap ban khmih bniah bha shwa ia ka”.
Ula pynpaw ba ka seng Congress kan dang khmih bniah bha ia kitei ki kot ki sla bad ula ong “Ka Expert Committee hi kala pynmih ia ka kaiphod kaba bniah bha bad haba ngim pat pule ia katei ka kaiphod bad kum ka seng kaba don ia ka jingsngewkhia, ngam tharai ba ngi lah iashong namar ba katei ka kaiphod ka long kaba jrong bah”.
“Ngi ngin sa khmih bha ha ki por ban wan bad ngin sa don ruh ia ki mat kiba ngin sa pynsngew bad kane baroh kan shong ha ka seng” ong u Bah Badwar.
Ka MLA ka TMC na Ampati, ka Miani D. Shira ruh kala ong, ba ka seng kan sa shong ban iatai bad khmih bniah ha shwa ban ai ia kano kano ka jingpynsngew.
“Ngi lah ioh ia ki kot ki sla na ka Committee bad ia ki jinglap jong ka Committee, kumta ngin sa iakren shwa ha ka kyrdan jong ka seng bad ia mynta hi ngin ym pat lah ban ong eiei, hynrei shisien ba ngi lah dep shong jingialang kum ka seng, ngin sa mih shakhmat ha kaban pynpaw ia ki jingsngew ki jong ngi” kala ong.
