Mih jyndat ka MCTA, KJDSTA na ka jingialang ka Sorkar halor ka CPF | Pyrshah ba don lang ki briew na Bank

Shillong, Jymmang 06 : Ka Meghalaya College Teachers’ Association (MCTA) bad ka Khasi Jaintia Deficit School Teachers’ Association (KJDSTA) ha ka sngi Balang, kila mih jyndat na ka jingialang ba pynlong da ka Tnad Education halor ka Meghalaya Non-Government Schools and Colleges Employees Centralized Fund Scheme, 2026, ban pyrshah ia ka jingdon lang ki briew na Bank bad ka jingbym khot lang ia ki kynhun ba don bynta hakhmat eh.

Ia kane ka jingialang la pyniaid da u Commissioner & Secretary ka Tnad Pule Puthi ka Jylla u Vijay Mantri.

U President ka KJDTSA Bah Bosswell Pala ula ong ba ki artylli ki association kila mih na ka jingialang namar “kam don jingmut’ ban bteng ia ka jingiakren ha ka jingiadonlang kiwei ki kynhun nongtrei deficit bad ki briew jong ka Bank.

“Na ka MCTA, ki President bad Secretary kila wan, na ka KJDSTA, ki President bad Secretary kila wan bad ngi la mih namar ba kam don jingmut ban iakren” ula ong.

U Bah Pala ula pynpaw ba ki kyndit ban lap ba ka Garo Hills Deficit School Teachers & Employees Association bad ka Meghalaya College Non-Teaching Employees Association ki khlem shah khot. “ Haba iohi ia ki kyrwoh khubor, ngi la kmen ba ki nonghikai deficit kin iakynduh bad ka Sorkar hynrei kaba pynkyndit ia ngi, ngi iohi shiteng na ki nonghikai ki skul deficit kaba mut ka GHDSTEA bad MCNTEA kim shym la shah khot sha ka jingialang” ula ong.

“Lada phi dei ban sngap ia ki jingsngewkhia jong ki nonghikai deficit bad ki nongtrei, khot ia ki kynhun baroh, baroh ki nongtrei deficit” ula ong.

Ka association kala kyntait ia ka rai jong ka Sorkar ban pyntreikam ia ka CPF schem 2026 bad kala dawa ban phaidien biang sha ka draft scheme bala mynjur ha u 2023.

U Bah Pala ula ong ba ka Sorkar kala “pynbor ban register na ka bynta kane ka skhim u snem 2026” wat hapdeng ka jing sahteng ka mukotduma hapoh ka Iingkashari High Court.

“Ka sorkar dalade ka dang ap ia ka rai jong ka High Court, la shu pynbor ban register na ka bynta kane ka skhim 2026. Kumta, da katei ka jingkhuslai ha ka dohnud jong ngi, da katei ka jingsngewsih ha ka jingmut jingpyrkhat, ngi la ong sngewbha sangeh ia kane hynrei ka don kaei kaei kaba ka Sorkar kam leh bym iohi bad kaei kaba ngi pan ka long tang ia kaba dei hok” ula ong.

Halor ka jingdon lang ki nongtrei ka Bank bad ki dkhot ka Board of Trustees ba dang shu thaw, u Bah Pala ula ong “Ngim tip kaei ka NPS, ngi tip ia kiwei kiwei haba iadei bad ka CPF bad ter ter, kumta ka long kaba bakla ia ka Sorkar ban khot ia ki briew ka Bank bad ki dkhot ka BOT. Shisha ngam ithuh ia ki bad ngam don jingtip ia kane namar nga dang bat beit ia ka BOT ba shong ain la ka dei ka bye-law, registration ne kiwei kiwiei, kiba laleh ha u 2023”.

U President ka KJDTSA ula kynthoh pyrshah ruh ia ka jingpyrshang ban wanrah ia ki nongtrei deficit hapoh ka Meghalaya Provident Fund Act, 1969.

“Ki la pyrshang ban thaw ïa ka khana ba kane ka Meghalaya Provident Fund Act, 1969 ka lah ban kynthup— kata ka dei ka jingpynsngewthuh bakla ïa ka hok kaba long ka jingleh bym shonghok haba ngi don ïa kane ka aiñ kaba dei thik tang na ka bynta jong ngi. Ngim lah ban pdiang ïa kata,” u la ong.