Shillong, Jymmang 06 : Ka Tnad Pule Puthi kan sa pynlong biang sa shisien ia ka jingiakren bad ki nonghikai ki skul bad college deficit ha ka 19 lane 20 tarik Jymmang ban iakren halor ka Meghalaya Non-Government School and College Employees Centralised Provident Fund Scheme, 2026, hadien ba mih ki jingpyrshah.
U Commissioner & Secretary ka Tnad Pule Puthi Vijay Kumar Mantri ula ong ba ha ka jingialang ban wan yn kynthup ia baroh ki association jong ki nonghikai deficit bad lait noh ia ki Ophisar na ki Bank bad ki dkhot ka Board of Trustees.
“Kumta ngi la rai ba ngin sa iashong sa kawei ka jingialang lehse ha ka 19 lane 20 tarik Jymmang bad ngin sa pynmih ia ka notice sha baroh” ong u Myntri hadien ba dep pyniaid ia ka jingialang ha ka sngi Balang.
“Ngi kwah ban khot lang ia kiwei ki association na ri-lum Jaintia bad kiwei kiba don bynta ha ka kam nonghikai bad lecturer deficit-ngin sa khot lang ia ki baroh bad ngin sa sngap ia baroh ki jingsngewkhia jong ki” ula ong.
Ula ong ba ka Tnad kala shim jingthoh ruh ia ki jingsngewkhia bala pynsngew da ka Meghalaya College Teachers’ Association bad ka Khasi Jaintia Deficit School Teachers’ Association, kiba la phet jyndat na ka jingialang ba long myn ha ka sngi Balang.
“Ka jingsngewkhia hi ka jong ki ka long balei ba ki briew ka Bank ki iadonlang bad balei baroh ki iadonlang, ka dei ban long tang hapdeng ka Sorkar bad ki nonghikai deficit. Ngi iaroh ia ka jingsngewkhia jong ngi bad namar kata, ngin sa khot tang ia ki nonghikai deficit bad ki lecturer ha ka 19 lane 20 tarik Jymmang. Ngin sa sngap ia ki bad peit ia kaei kaba ngi lah ban leh” ong u Mantri.
Ha ka jingialang ba long ha ka sngi Balang la wan ban iashimbynta da ki nongmihkhmat na ka MCTA, KJDSTA, ki dkhot ka Board of Trustees bad ki Ophisar ka State Bank of India (SBI). Ka SBI ka dei kaba la bynshet ban pyntreikam ia ka CPF scheme 2026 na ka bynta ki nongtrei jong ki skul bad college ba iarap ka Sorkar.
Ha kane ka jingialang, ka MCTA kala ong ba kan kiar na ka jingiakren bniah namar ka kam ba iadei bad ka CPF scheme ka dang don hapoh ka jingbishar ka Iingkashari Meghalaya High Court.
Ka KJDSTA kala pynpaw ia ka jingsngewkhia ba ki nongmihkhmat na kiwei ki thain, khamtam na ri-lum Garo, kim shym la donlang bad ong ba ka jingiaren ka dei ia mynta ban long shuwa tang bad ki nonghikai deficit bad ki lecturer.
“Haba shimkhia ia kine ki jingsngewkhia, ka Tnad Pule Puthi kala rai ban pynlong sa kawei ka jingialang ba kynthup ia ki nongmihkhmat na ki nonghikai deficit bad lecturer na kylleng ka Jylla ha ka ban pynthikna ia ka jingiasyllok bad ka jingiashimbynta kaba kham bun” ong u Mantri.
Ka All Meghalaya Primary School Teachers’ Association kala kyrpad ban pynlong ia ki jingialang pynsngewthuh halor ki kyndon bad ki bynta ba iadei bad ka jingtreikam jong kane ka scheme ba thymmai.
Ka Tnad ka pdiang ia ka jingai jingmut bad mynjur ba ka jingialang ban batai bad pynsngewthuh ia ka skhim kan ai jingmyntoi bha ia baroh ki kynhun kiba don bynta” ula ong.
Halor ki nonghikai bad lecturer bala shongthait, kiba bun kila pan jingbit ba sei 100% ia ka pisa jong ka CPF bala pynlang ha ki account jong ki.
