Ther ka HYC ba kiewdor ka haduh T.450 klur ka NST Water Project | Kynnoh ia jingpyniaid bakla kaba jur

Shillong Jymmang 06: Ka Hynñiewtrep Youths’ Council (HYC) ha ka sngi Balang, kala pynrem jur ïa ka jingkiew dor jong ka New Shillong Township (NST) Water Supply Project na ka T.321 klur sha ka T.770 klur hapoh kane ka sorkar MDA.

“Kane ka jingkiew dor kaba jan kot sha ka T.450 klur ka pynpaw ïa ka jingpynsepei ia ka pisa paidbah, ka jingbym don plan kaba biang bad jingbym don jingïatreilang hapdeng ki tnad sorkar bapher bapher” la ong u President ka HYC u Bah Roy Kupar Synrem.

“Ka long kaba ym lah pdiang ba ka projek kaba la sdang pynbit pynbiang ha u snem 2014 ha ka dor kaba long T.321 klur mynta kala kiew syndet sha ka T.770 klur, na ki daw kiba ka sorkar hi ka phla ba kadei namar ba ym shym pynkhreh ne bishar bniah shuwa ban sdang ka kam. Kine ki pynpaw ia ka jingbym salia jong ka Sorkar ia ka pisa u paitbah da kaba shu leh thurmur bad wanrah ka jingduhnong pat ia ka Pla Tyngka jong ka Jylla hi baroh kawei” la ong u Bah Synrem.

“Mano ban shim ia ka jingkitkhlieh halor kane ka jingkiew jong ka dor? Balei ym shym la leh bha ïa ki “Feasibility Studies” bad jingpynkhreh shuwa ban mynjur ïa ka projek? Balei ka pla tyngka u paitbah kan shah ktah na ka jingbym lah treikam bad ka jingbym jingřïohi jngai jong ka sorkar? La buh jingkylli u nongialam ka HYC.

Ula ong, ba ha kum kane ka por ba ki paidbah ka jylla Meghalaya ki ïakynduh jingeh kum ka jingbym donkam donkam, ki surok kiba sniew, ka jingduna um, ka jingbym biang ki jaka sumar bad ka jingbym don ki jingtei paidbah kiba kongsan, kane ka jingpynkiew ia ka dor jong ka projek ka pynmih ïa ki jingsngewkhia kiba jur la kane ka kam ka khuid ne em, don ei ei ne em sha lyndet bad ioh lehse lah pyndonkam bakla ia ka pisa paitbah.

“Ka pisa paitbah kam dei ka Nongkynti shimet jong kano kano ka sorkar lane contractor. Man la kawei pa kawei ka pisa kaba shah pynlut kai namar ka jingbym lah treikam lane ka jingthurmur jong ka Sorkar ka long ka jingniewbein ia u paidbah ka Jylla hi baroh kawei” ong u Bah Synrem bad ka bynrap, “Ka HYC ka kyntu ba ka sorkar kadei ban sangeh ban shim sting ïa ka pisa paidbah bad ban pynthikna ïa ka jingkhuid suba ha ka rukom pynlut ia ka pisa paidbah bad ka jingsynshar paidbah kaba don jingkitkhlieh”.