Shillong, Jymmang 06: Ha ryngkat ka jingkynnoh ba don ka jingpynjot ia ka mariang ha East Jaintia Hills, ka Khasi Students’ Union South West Border Circle ka la ujor sha ka Meghalaya State Pollution Control Board ban shimkhia mardor halor ka jingsuba ba don ka jingpynjaboh iaka Wah Prang.
Ka KSU kala phah daka shithi shaka MSPCB ka ba kdew ba katei ka wah ka ba long ka tyllong um kaba kongsan bha na ka bynta ki nongshong shnong, ka la pyni ia ki dak jong ka jingjaboh.
Ki nongshong shnong ki la ïohi ïa ka “jingkylla rong ha ka wah mynta u snem, kaba ka pyni iaka jingbaboh jong ka um bad kaba buh jingma lada pyndonkam.
La iathuh ba kala don ka jingiap ki dohkha ka ha ka Wah Prang naka por shaka por ha kine ki san snem ba la dep, khamtam haba sdang ka aiom lyiur.
Hynrei mynta u snem, kane ka jingma ka la nang jur, ha kaba la sakhi biang iaka jingïap ki dohkha bad ka jingkylla rong ha ka um bad kane kala wanrah ia ka jingma kaba khraw iaki nongshongshnong.
Ka KSU ka la ong ba ka jingjaboh ym tang ba ka buh jingma ia ki jingthaw ba im ha um bad ha shilynter ka wah hynrei kan ktah ruh ia ka koit ka khiah bad ka jingim jong ki briew kiba pyndonkam ia kane ka um man ka sngi.
Ka la kynthoh ba ka jingpynjot ia ka mei mariang ha shilynter jong ki wah ka pynkhein ia ka hok ban ioh ia ka mariang kaba khuid bad kaba koit ba khiah kaba la pynthikna katkum ka Article 21 jong ka Riti Synshar.
Haba kdew iaka Prevention and Control of Pollution) Act, 1974, ka KSU ka la pynkynmaw ïa ki bor ba dei peit ïa ka kamram jong ki ban ïada bad tehlakam ïa ka jingshah pynjaboh jong ki wah da kaba ban jur ba kano kano ka jingpyntuid ïa ki jaboh na ki karkhana ne ka jingtih marpoh khyndew sha ki wah ka long kaba be-aiñ.
Ka KSU ka la dawa ban phah Test mardor ia ka um, ban ithuh ia ki tyllong ba wanrah ka jingjaboh iaki wah, bad ban leh da ka ain pyrshah ia kiba pynkhein.
Ka ban jur iaka jingdonkam ban shim iaki sienjam ban pynbeit kyrkieh ban pynim biang ïaki wah bad ban buddien khnang ban lait na kum kine ki jingjia ha ki por ban wan, da kaba ban jur baka Sorkar kadei ban shimkhia mardor halor kane.
