Umiam, Jymmang 06 : U Myntri Rangbah ka Jylla Conrad K Sangma hynne ka sngi ula ong ba ka kam jngohkai ha Meghalaya kan long kaba jop satang lada baroh ki kynhun kiba don bynta ha ka kam, kin iatreilang kum shibynta jong ka jinglong jingman kaba kham iar.
Ula kren ia kane haba iashimbynta ha ka jingialang pynkupbor ia ki Tourism Champion ka Meghalaya kaba la pynlong ha Orchid Lake, Umiam.
Happy to celebrate the empowerment of our Tourism Champions at Umiam today by handing over various sanctions aimed at strengthening livelihoods, improve infrastructure, build skills, and elevate Meghalaya’s tourism experience.
1. Distributed sanction letters to new beneficiaries… pic.twitter.com/HusydscNxJ
— Conrad K Sangma (@SangmaConrad) May 6, 2026
Kane ka prokram kaba la pynlong da ka Tnad Jngohkai, ka Sorkar Meghalaya, ka wanrah lang ia ki kynhun ba don bynta ha ki kam jngohkai, ki nongsengkam, ki nongshna jingshna, ki samla pule, ki nongialam shnong bad ki nongioh jingmyntoi na kylleng jong ka Jylla.
Kane ka jingialang ka pyni ruh ia ka jingpyrshang jong ka Sorkar ban pynkhlain ia ka kam jngohkai lyngba ka jingsengkam hi da ki shnong, ka jingpynroi ia ki jingtei, ka jingpynroi ia ki sap treikam bad ka jingthaw ia ki lad kamai kajih.
Haba kren ha ka jingialang, u Myntri Rangbah Conrad K Sangma ula niew ia kane ka jingialang kum u mawmer ba kongsan ha ka jingiaid lynti ka kam jngohkai ha Meghalaya bad ula ai khublei ia ka Tnad Jngohkai, ki Kynhun ba don bynta, ki nongsengkam hala ki jong ki shnong ki thaw namar ka jingiapyrshang lang ban pynskhem ia ka jingdon ka Meghalaya ha ka national tourism map bad ka jingnang paw ha ka pyrthei jngohkai ka pyrthei.
Ula ong ba ka kam jngohkai kan ym long kaba jop lyngba ka jingpyrshang jong ka Sorkar marwei, lane lyngba ka jingpyrshang jong ki trai hotel shimet, ki nongniah taxi, ki trai restaurant lane kino kino ki kynhun ba don bynta ha ki kam jngohkai kiba trei marwei marwei. “Ka kam jngohkai ka thnem tang lada baroh ki kynhun ba don bynta ha ka kam ki shim iala ka jong ka bynta” ula ong, haba bynrap ba wat hapdeng ki jingeh kiba bun, ka Meghalaya kala sdang ha ka lynti kaba khlain ban kyntiew ia ka kam jngohkai.
Haba ban jur ia ka jingiohi jngai kaba bun snem jong ka Sorkar, ula ong ba ka kam jngohkai kam kut tang ha ki tamasa,, hotel lane ki prokram ban pyni ia ka riti dustur hynrei ka dei ha kaban thaw ia ka jinglonng jingman kaba pura ka ban ai mynsiem ia ki nongshangkai ba kin jied ia ka Meghalaya kum ka jaka ba kin wan. “Haba ka longiing ka iashong lang shijaka bad rai shano ba ki kwah ban leitkai, ka Meghalaya ka dei ban paw. Ka Meghalaya ka dei ban khring. Ka Meghalaya ka dei ban long ka jaka ba kan mihpaw ha ka jingmut jingpyrkhat jong ki” ula ong.
Ula ong ba tang ka jingiohi kam pat biang satia, bad ki nongjngohkai ki pyrkhat ruh ia ki jingtei, ki lad pyniasoh, ka jingshngain, ka jingsngew aram, bad kaei kaba ki shem hashuwa ba kin jied ia ka jaka wan. “Ka thong jong ngi ka long kaba suk-man ki nongjngohkai kiba wan sha Meghalaya ki dei ban mih ryngkat ki jingkynmaw ki ban neh shirta ka jingim” ula ong.
Haba shim na ki jingshem nalade haba leit jingleit, u Myntri Rangbah ula ong ba ki jingshem ha ka kam jngohkai kiba sah jingkynmaw bunsien ki dei ki jingmad ia ki jinglong shisur shidur jong ki briew ban ia ka spah ka phew.
Haba kren halor ka jingkynshew pisa ka Sorkar ha ka jingpyn pawnam ia ka kam jngohkai bad ki jingtei, ula ong ba ki jingialang, ki tasama bad ki project kam jngohkai ki don ia ka bynta ba kongsan ha kaba pynwandur ia ka jingsngewthuh bad ban khring ia ki nongwan shangkai sha ka Jylla.
Haba kren halor ka lynti iaid ka Jylla ha ki kam jngohkai, ula ong ba katto katne ki project ba pawnam ki dang don ha ka jingpyntrei mynta, kynthup ka Shillong Ropewat, ka Mawkdok Skywalk, ka Rain Museum ha Mawsynram, ka Living Root Bridge Museum, bad ki Tourist Centre ha Sohra, Mandalgre bad Siju.
Ula pynbna ruh ia ka jingkylla kaba khraw ha ki lad pyniasoh, haba pynpaw ba ka jingpynheh ia ka Shillong Airport kala iaid shakhmat mynta, ha kaba ka jingpyntrei pynheh ia ka runway la dep ban aiti da ka Sorkar India. U ong ba ia ka project la khmih lynti ban pyndep la kumno kumno ruh hapoh ka 15 bnai bad kan plie lad ia ki liengsuin kiba heh ba kin wan haduh Shillong. “Kane ka dei ka nongwanrah ia ka jingkylla na ka bynta ka kam jngohkai ha Meghalaya” ula ong.
Haba ai khublei ia ki nongioh jingmyntoi bad ki kynhun ba don bynta ha ki kam jngohkai, ula iai ban ba man ki sienjam bala shim da ka Sorkar ka dei kaba la pynwandur ban pynkha ia ki kabu na ka bynta ki nongshongshnong “Man ki prokram, man ki policy, bad man ki kam thymmai jong kane ka Sorkar ka dei kaba la pynwandur ha kawei ka thong- ban shakri ia ki nongshongshnong jong ngi” ula ong, haba bynrap “Ka Sorkar jong ngi ka dei ka Sorkar kaba buh shuwa ia u paidbah hakhmat eh”.
U Myntri kam Jngohkai Timothy D Shira ula ong ba ka jingwan iuhkjat ki nongjngohkai ha Meghalaya kala kiew bunshah bha, ha kaba ki jingkhein antad ka pyni ba ka jan kot ia ka 18 lak ngut ha u snem 2025. “Ka kam jngohkai kam dei shuh tang halor ka jingwan iuhkjat ki nongwan shangkai- kala kylla long kawei na ki paia bakhlain duh jong ka ioh ka kot ka Jylla jong ngi” ula ong.
Ula pyntip ba palat 150 tylli ki project kam jngohkai ki dang iaid mynta ha ka jingpyntreikam ha kylleng ka Jylla da ka jingkynshew pisa ba kot da ki hajar klur, nalor ka jingnang wan iashimbynta na ki kynhun shimet.
Kane ka prokram kala kynthup ruh ia ka jingai jingbatai da ka audio-visual, kaba pyni ia ka jingiashimbynta haduh 80 ngut ki nongshna jingshna kti na Meghalaya ha ka Surajkund International Crafts Mela, ha kaba la pyni ia ka Meghalaya kum ka Jylla kum ka phang pdeng, kumjuh ruh kum ka jingleit peit kai ki kynhun ba don bynta ha ki kam jngohkai na Sohra sha Ekta Nagar.
U Myntri Rangbah ka Jylla ula aiti ruh ia ka khusnam jingshlur ne “bravery award” sha u Teiborlang Pakma namar ka jing pynlait im ia uwei u briew ba ngam jyllop ha Nan Polok.
Ha kane ka prokram, u Myntri Rangbah ula pynbna ruh ia ki nongioh jingmyntoi ba thymmai hapoh ka Chief Minister’s Meghalaya Home Stay Misson bad ai jingithuh ia ki nongioh jingmyntoi kiba jop ha ka jingtreikam hapoh ka Chief Minister’s Homestay Scheme-PMEG. Da ka jingsdang ha u Nailur 2025, ka Mission ka thmu ban pynkha sa 3000 tylli ki homestay ba thymmai hapoh u 2028 bad pynkha ia ka lad iohkam ia palat 15,000 ngut ki briew ha kylleng ka Jylla. Haduh mynta, la ai jingmynjur ia ki 80 tylli ki aplikeshon jong ki homestay, ha kaba 55 tylli na ka thain Khasi, Jaintia bad Ri-Bhoi lah mang ia ka song jingiarap da ka pisa kaba kot haduh T.3.85 klur.
La sam ruh ia ki sanction letter hapoh ka Community-Led Infrastructure Scheme, kaba thmu ban pynkupbor ia ki Shnong ki thaw, ki Cooperatives, bad ki Tourism Society ba kin pyntrei ia ki jingtei kam jngohkai ha ki jaka jngohkai ba dang sdang paw bad sdang bun ki nongwankai. Katba 20 tylli ki project kila iaid shaid shaid mynta ha ka jingpyntreikam, ka Sorkar hynne ka sngi kala pynbna sa 58 ngut ki nongioh jingmyntoi ba thymmai na ka thain Khasi, Jaintia bad Ri-Bhoi, da ka jingmang ia ka song jingiarap ba kot T.3.40 klur.
Ka Sorkar kala pynbna ruh ia ka jingtynruh ban pynbha ia ki jingdonkam paidbah ha ki jaka shangkai kiba don ha kylleng ka Jylla. Ka jingpynbiang ia ki jaka leit bar ki dang iaid shaid shaid ha ka jingpyntrei mynta, jingmaramor, lane kyntiew kyrdan ia 84 tylli ki jaka jngohkai hapoh ki skhim bapher bapher. Tang hapoh ka State Scheme, 17 tylli ki jaka jngohkai kiba heh, kynthup ka Living Root Bridge, Nan Polok, Laitlum, Mawphanlur, Umiam Lake View Point, Kshaid Krang Suri, Wari Chora bad Siju, kila don mynta ia ki jaka leit bar kat kum ka juk ia kiba la pynlut haduh T. 3.44 klur.
Ki samla pule jong ka Institute of Hotel Management Shillong ruh kila ioh pdiang ia ka scholarship certificate hapoh ka Chief Minister’s Meghalaya Hospitality Scholarship Scheme. Haduh mynta, 21 ngut ki samla pule kila ioh ia ka scholarship ba siew pura ia ka bai pule kaba kot T.3.67 lak marwei, katba 37 ngut ki samla pule kila ioh ia ka stipend ba shisnem kaba long T.32,000 hapoh ka reserve category jong u snem pule 2023-24 haduh 2025-26.
U nongioh jingmyntoi hapoh ka Chief Minister’s Homestay Scheme-PMEGP, Daminot Kharchandi, ula iasam ia ka khubor halor ka lynti iaid jong ki ha ka jingsengkam lajong, haba pynpaw ba ka jingiarap song pisa jong ka Sorkar haba sdang, kala ai ha u ia ka jingsngewskhem ban sdang ia ka kam wat hapdeng ka jingbym don ka jingshemphang ban trei ia ka kam.
Ula ong ba kaei kaba sdang kum ka homestay kaba rit ba tang lai tylli ki cottage, mynta kala heh bad kylla sha ka Mukhan Resorts, kaba la nang bit nang biang haba phai shaki jingdonkam.
