Ka jingkam ka BJP kaba eh bha ha Meghalaya
Shillong, Jymmang 05 : Ki paidbah ki dang bteng ban shaniah ha ka NPP namar ki kam pynroi ba kila iohi hapoh ka jingialam u Myntri Rangbah Conrad K Sangma bad ki arngut ki Symbud Myntri Rangbah ha kine ki khyndiat snem bala leit, ong u Myntri Sorkar ba NPP Youth President Bah Wailadmiki Shylla ha ka sngi Ba-ar.
Haba kynthoh halor ka jinglehbha ka BJP ha ka elekshon Assam bad Bengal, u Bah Wailad ula ong ba um kwah ban kynthoh eiei namar kaei ka jigmih ka shong eh ha ka rai u paidbah. “Ngam lah ban kynthoh eei namar kumba phi tip ba ha ka sain pyrthei, ka shong eh ha ka rai jong u paidbah” ula ong.
“Kumta, nga sngew ba kaei kaba nga sngewbha bad na kaei kaba nga iohi, nga sngew ba ki paidbah ki dang shaniah ia ngi hapoh ka jinglong nongialam ba treikam bha jong u CM jong ngi bad nga tharai baroh kim lah ban kyntait ia ka jingwan ka roi ka par ha kine ki khyndiat snem, hapoh kka jingialam jong u CM jong ngi bad ki arngut ki DyCM” ong u Bah Wailad.
Ula pynpaw ia ka jingsngewskhem ba ka NPP kan dang iai bteng ban ioh ia ka jingkyrshan u paidbah. “Kumta, nga sngew skhem pura ba ki paidbah kin iadonlang beit bad ngi bad kin ai biang ia ka lad ha ngi ba ngin shakri ia ki wat hadien habud”.
Halor ka jignkam ka BJP ba kan ialam ia ka Sorkar ha Jylla, u Bah Shylla ula ong ba kum kata ka jing kam kan long kaba eh bha haba peit ia ka jinglong ka sain pyrthei ha Meghalaya.
“Ngam tip satia namar ngi don la ka jong ka rukom sngew. Khlem pep ia ki, ki don la ka jong ka rukom peit ia ka, hynrei ha nga hi ngan ym lah ban ong ba kam long kaba lah, hynrei kaba eh bha” ula ong.
Ula kdew ia ka jingdon MLA ka BJP mynta ha Iingdorbar ban pynieng la ka nia. “Khatam ha Jylla kum ka Meghalaya ha kaba ngi la ioh ba wwat haduh mynta, ki arngut ki dkhot ka BJP kiba don ha Iingdorbar Thaw Ain, kila jop namar ka jinglah jong ki shimet” ong u Bah Wailad.
“Kam dei satia namar ka party namar ha Meghalaya nga la iohi ba kam dei ka sain pyrthei ki seng sain pyrthei. Ka dei ka sain pyrthei ba shimet. Kumta ka shong ha ki jait kyrtong aiu ba ki wanrah, kumta, nga sngew ba kane kan kham long kongsan” ula bynrap.
