Shillong, Jymmang 05 : Ka NPP kala don ha ka bynta ba khatduh jong ka jingiakren halor u kyrtong na ka bynta ka elekshon shiteng samoi ka Shillong Lok Sabha, bad ka jingpynbna ia u kyrtong ka lah ban long hadien ka jingialang General Executive meeting ban long ha ka 7 tarik Jymmang.
Ia kane la pyntip da u Myntri Sorkar bad State Youth President ka NPP Bah Wailadmiki Shylla ha ka sngi Ba-ar, haba pynpaw “Khlem pep, ngi la don ha ka bynta ba khatduh jong ka jingiaken, ngin sa ioh ia u kyrtong, kumta nga kyrpad ia ki nongpathai khubor ba kin sngewbha iai shah bad ngi tang shisngi arsngi duh, phin sa ioh ia ka khubor”.
“Hooid, ha ka 7 tarik ngin shong ia ka General Executive meeting bad kane ka dei ka jingthmu ban pynbna ia u kyrtong” ula bynrap.
Halor ka jingmih khubor ba ka kyrteng u James PK Sangma kala mih na ka bynta ka shuki Rajya Sabha, u bah Wailad ula ong ba ka jingiakren ka dang iaid bad ia ka rai ba khatduh ynsa shim da ki nongialam ba halor.
“Ka jingiakren ka dang iaid, hooid ka kyrteng jong u kala mih hynrei nga tharai ka shong ha ki nongialam ba halor ba kin shong bad shim rai ia ka kyrteng” ula ong.
U pyntip ba ki don 4-5 tylli ki kyrteng kiba dang iapyrkhat ban jied sha Rajya Sabha hynrei “Nga sngew ba ka dang kloi palat ia nga ban iathuh bad kumta kumba nga ong, ka shong ha ki nongialam ba halor ba kin iashong bad shim ia ka rai”.
