Shillong, Jymmang 04: Haba batai ïa ka jingjop jong ka BJP hapoh ka Jylla West Bengal kum ka jingjop jong ka jingshaniah pyrshah iaka jingtieng, ka Meghalaya BJP ka la ong ba ka result ka pyni ïa ka jingkyntait ïa ka jingpynsngewbha, ka jing pynshlur ia ki kam rung tuh ki briew, ka bor pisa bad ka sain pyrthei da ki kam bymman hapoh ka jylla.
Ka Meghalaya BJP ka la ai burom ïa u Dr Syama Prasad Mookerjee da kaba ong “ka jingangnud jong u ban ïoh ïa ka Bengal kaba kynthup lang bad ka India kala urlong mynta ka sngi”.
Ka Meghalaya BJP kala kynmaw burom ruh ia ki nongtrei ka BJP kiba la shah pyniap hapoh ka Jylla West Bengal.
“Ngi kynmaw burom ia ki spah ngut ki nongtrei ka BJP, ki baha ing ha sem jong ngi, kiba la aiti ia la ka jong ka jingim ban pynthikna iaka jingjop jong ka BJP ban wanrah ia ka lawei ba phyrnai hapoh ka Jylla West Bengal” ong u nongaiktien ka Meghalaya BJP Bah Mariahom Kharkrang.
“La knieh noh ia ki na ngi da ki kam pyntriem bad da ka synshar kaba sniew bad kaba shyrkhei, hynrei ka jingkynmaw ia ka jingaiti lut jong ki ka long kum ka jingai mynsiem ia ki nongtrei BJP ha man la ki jaka.”
Haba shim iaka result kum ka jingjia ba kongsan ha ka histori jong ka sain pyrthei ha West Bengal, u Bah Kharkrang u la ong, “Ki briew jong ka West Bengal ki la rai ban pynïahap ïalade bad ka jingangnud jong u Myntri Rangbahduh ka ri u Narendra Modi ji ban poi shaka viksit Bharat….ngi ai khublei ïa ki paidbah ka West Bengal halor ka rai kaba kila shim”.
U nongialam ka BJP u la kynthah ia ka Trinamool Congress halor ka jingpyrshah jong ka ban leh iaka Special Intensive Revision (SIR) ia ki thup kyrteng ki nongthep vote.
“Ngi la iohi ia ka drama ba ka TMC hapoh ka jingialam jong ka Mamata Banerjee ka la leh ha West Bengal halor ka SIR, watla la lah ban pyntreikam suk ia ka ha ki 12 tylli ki Jylla jong ka ri” u la ong.
“Ngi kyrmen ba ki Liang Pyrshah mynta ki la sngewthuh ba ka sain pyrthei kaba sniew bad ki jinglamler kim treikam shuh.”
Haba ai burom ïa ki bor pahara ka Sorkar Pdeng ban pynïaid ïa ka ilekshon, u Bah Kharkrang u la ong “Ngi ai khublei kyrpang iaki bor pahara ka Sorkar Pdeng namar ha West Bengal ha ka sien kaba nyngkong ka la ïohi ïa ka Ilekshon kaba suk, kaba khuid. Ka long kaba sngewtynnad na ka bynta ka Jylla ha kaba ka jingïap briew ha man la ka ilekshon ka long haduh 75 ngut haduh mynta.”
Ka BJP Meghalaya ka la ai khublei ruh ïa ka Assam BJP namar kala jop biang haka sien kaba lai da kaba ong ba ka jingsynshar kaba khuid, kaba bha bad ka synshar khaddar kaba pyniajan iaki nong shong shnong ka jop ïa ki jingshah ïalam bakla naka por shaka por”.
Haba kdew ïa ka jingthep Vote ki paidbah, u Bah Kharkrang u la ong “Ka long kaba donkam ban kdew ba ki jaitbynriew reiwngeit Khristan jong ka Jylla Assam ki la thep vote ïa ka BJP, kane kan pynthikna ba kan sa paw sa ha Meghalaya ha ka ilekshon MLA 2028.”
Haba kynthoh iaka Congress, u Bah Kharkhrang ula ong “Kaba khatduh eh, kane ka dei ka jingshah rem kaba 99 sien jong u Rahul Gandhi bad ka Congress.
Ka Meghalaya BJP ka ai khublei ruh ïa u Myntri Rangbahduh ka ri u Narendra Modi, u Myntri ka tnat kam pohïing u Amit Shah Ji bad u President ka BJP u Nitin Nabin halor kine ki jingjop jong ka Party.
