Shillong Iaiong 30: U Myntri Khynnah ka Sorkar Pdeng uba khmih ia ka Agriculture and Farmers’ Welfare u Ramnath Thakur hynne ka sngi Palei, ula lum ia ka jingialang ban khmih bniah ia ka jingpyntreikam ia ki skhim bapher bapher jong ka Sorkar Pdeng bad ula iakren halor ki jingeh kiba la mad da ki tnad bapher ha kaban pyntreikam ia ki skhim.
Ha kane ka jingialang la wan ban iashimbynta lang da u Myntri Sorkar ka Jylla uba khmih ia ka Agriculture and Farmers Welfare u Timothy D Shira, Director ka ICAR Research Complex for NEH Region ryngkat bad ki khlieh jong ki tnad treikam, u Director of Agricultural Technology Application Research Institute, Umiam, ki nongmihkhmat ka Central Potato Research Station, Upper Shillong bad ki heh ophisar na ki tnad bapher bapher.
Haba banjur ia ka jingkongsan ban pyntreikam thikna, “U Myntri Khynnah ula banjur ba bun ngut ki nongrep dei ban wanrah hapoh jong ka jylli jong kitei ki skhim ba kin ioh ia ki jingmyntoi” la ong ki ophisar.
Ula kyntu ruh ia ki tnad jongka Sorkar Pdeng bad Sorkar Jylla ba kin iatrei ryngkat bad ban iasnohkti lang na ka bynta ka bha ka miat jong ki nongrep bad ka longiing longsem jongki.
Ha kane ka sngi, u Myntri Khynnah ula pyllait paitbah ruh ia 5 tylli ki ‘Pocketbooks’ kiba la pynmih da ka ICAR Research Complex for NEH Region halor ka “Green Manuring Crops” kum ka Cowpea, Dhaincha, Sesbania bad Sunhemp ryngkat bad ki buit rep da kaba pyndonkam ia ka Vermicomposting.
Kane ka sienjam ka thmu ban kyntiew ia ka lad rep da kaba kiar ban pyndonkam ia ki dawai dashin ha ka rep ka riang.
Ki ophisar kila ong, “Ki ‘Pocketbooks’ kidei kiba la khmih lynti ba kin pynkup bor ia ki nongrep ban pynshlur ia ki ban pyndonkam da ka Natural Nitrogen Fixation Methods, kaban pynduna ia ka jinglut jingsep ha ka rep ka riang bad ban kyntiew bad pynneh pynsah ia ka rukom rep kaba iai neh”.
“Kine ki sienjam kidei kiba la maitphang na ka bynta ban noh synniang sha kaban tei ia ka Atmanirbhar ha ka kam rep kam riang bad ban pynurlong ia ki jingiohi jngai jong u Myntri Rangbahduh ka ri ban pynneh pynsah, ban shaniah halade bad ban kiew shaphrang ka Viksit Bharat hapoh u snem 2047.”
